Owek.Nelson Kawalya eyali omukubiriza w’Olukiiko lwa Buganda afudde!

Eyali omukubiriza w’olukiiko lwa Buganda Owek.Nelson Kawalya avudde mu bulamu ɓw’ensi obudde bwebubadde bukya.

Afiiridde mu ddwaliro e Mengo gy’abadde addusiddwa ng’embeera etabuse.

Yazaalibwa 27 September, 1940 era afiiridde ku myaka 84 egy’obukulu.

Mutabani we Ssenteza Victor Kawalya agambye nti nga family nga bakolera wamu n’ekkanisa, Obwakabaka ne Rotary bagenda kutuula okufulumya enteekateeka y’okuziika.

Abadde yakajaguza emyaka 50 mu Bufumbo obutukuvu

Nga enaku z’omwezi 14 December,2024 Owek Nelson Kawalya yakoze omukolo ogw’ebijaguzo eby’emyaka 50 mu bufumbo obutukuvu.

Ssabasajja Kabaka Ronald Muwenda Mutebi II yamuweereza obubaka bweyatuma Omulangira Kintu Wasajja, yamusiima olw’emirimu gy’akoledde Obuganda, n’amwebaza n’okukuuma obufumbo.

Ku mukolo Owek.Nelson Kawalya kweyajagulizza emyaka 50 egy’obufumbo obutukuvu n’omukyala Naava Annet Kawalya

Omulabirizi eyawumula, Wilberforce Kityo Luwalira nga yeyakulemberamu okubulira ku mikolo egyo , bweyali abakubya ebirayiro ebyemyaka 50, yebazizza nnyo mukyala we Naava Annet Kawalya olwebyo byakoze ebisobosezza Oweek Kawalya okufuuka omuwereza owenjawulo mu ggwanga lye.

Baafumbiriganya mu mwaka gwa 1974.

Omulabirizi Luwalira yayogera ku Kawalya ng’omuntu eyali omukkakkamu, abeera n’akamwenyumwenyu buli kadde, era abadde omuweereza mu bintu ebyenjawulo ate nga takulembeza kwekkusa yekka.

Aweerezza Obwakabaka bwa Buganda mu biti ebyenjawulo

Minister wa Buganda ow’eby’amawulire Owek.Israel Kazibwe Kitooke agambye nti Owek.Kawalya aweerezza Obuganda mu bifo ebyenjawulo awatali kwebalira.

Eyaliko Katikkiro wa Buganda Owek.JB Walusimbi n’Owek. Nelson Kawalya eyaliko omukubiriza w’Olukiiko, baali bagenda kulindirira Ssaabasajja Kabaka mu kuggulawo olukiiko olw’omulundi ogwa 27.

Katikkiro w Buganda Charles Peter Mayiga lweyalambula Owek.Nelson Kawalya mu ddwaliro e Mengo gyeyali amaze ennaku ng’olumbe lumubala embiriizi

Yaliko Omukiise mu kibiina ky’olulimi oluganda, minister w’ebyobulamu, Omukubiriza w’Olukiiko lwa Buganda, era y’abadde omukuza w’omutaka Kalibbala.

Abadde yakatwala omutaka Kalibbala okukyalira bazzukulu b’essiga kya Kalanzi

Omukolo omulala gw’asembyeyo okubeerako, gwali gwa bazzukulu ba Kalibbala mu ssiga lya Kalanzi e Kiryanyonza mu Ggombolola ya mumyuka Kalamba mu ssaza Butambala, Omutaka Kalibbala bweyali akyaliddeko bazzukulu be ab’essiga eryo.

Owek Nelson Kawalya yabakubiriza okukola kyebasobola okukyuusa ekika kyabwe nga batandikawo ebintu byenkulakulana, n’okukulaakulana embuga z’amasiga zonna n’ekika.

Abakozi b’Obwakabaka bwebaamumyalirako mu maka ge, mu January wa 2019 olumbe werwamuluma ennyo

Owek.Nelson Kawalya abadde munnaRotary ow’ensonga

Abadde munnarotary ow’amaanyi era nga yeyatandikawo Rotary Club ye Mengo era n’afuba okulaba ng’ebeerawo, kati emyaka egisoba mu 30.

Abadde past District governor wa Rotary.

Owek.Nelson Kawalya lweyatuuza Dorah Ngabo mu rotary, ng’ono muwala w’omugenzi Samuel Owori eyalondebwako nga International president wa Rotary munsi yonna

Owek.Kawalya akubiriza abakulembeze mu biti ebyenjawulo okwagazisa abavubuka okuyingira Rotary, n’obuweereza obwenjawulo.

Mu July wa 2024, abaasomerako ku ssomero lya Buddo Junior School bamusiima era nebamuwa engule, ng’omu ku bantu abakoleredde ennyo essomero eryo

Abadde omukiise ku lukiiko oluddukanya essomero lya Kampala School for the physically handcapped.#