Wofiisi ya Kaliisoliso wa government ekutte abakozi ba parliament ya Uganda 7, nebatwalirawo mu kooti nga bavunaanibwa okwenyigira mu mivuyo egyanjawulo mu parliament, nebabulaankanya ensimbi z’omuwi w’omusolo.
Kooti ewozesa abalyake naabakenuzi ebasindise ku alimanda okutuusa nga 08 July,2026 lwebanaakomezebwawo mu kooti.
Ba mbega mu wofiisi ya Kaliisoliiso babadde bamaze akaseera nga babanoonyerezako ku bigambibwa nti bebamu ku benyigira mu bulyake n’obukenuzi, naddala mu kisanja kya parliament ey’omulundi ogwe 11, ebadde ekubirizibwa Sipiika Annet Anitah Among
Abavunaanibwa kuliko Omwogezi wa Parliament era akulira eby’amawulire Chris Obore, Adilo Daniel abadde akulira abakozi, Okema Leonard abadde Secretary mu office ya Sipiika, Rajab Kaaya Ssemalulu munoonyereza mu Parliament , Okwi Emmanuel Emuron Principal Protocol Officer ku Parliament, Itute Stella Muyambi ku mirimu gya Parliament saako Otebata Vincent Capacity Development Officer ku Parliament nabalala.
Omwogezi wa wofiisi ya Kaliisoliiso wa government Ali Munira ategezezza CBS nti waliwo abakozi abalala ku Parliament abanoonyerezebwako, era essaawa yonna bakuyitibwa eri Kaliisoliiso wa government okubaako byebanyonyola.
Ekikwekweto ku kunoonyereza ku bulyake n’obukenuzi ku Parliament ya Uganda kyatandikira ku eyali Sipiika Annet Anita Among, abakuuma ddembe bwebazinga amaka ge agawerako era ne batwala neezimu ku mmotokaze saako ebintu ebirala.#
