Government ya Uganda erangiridde nti eyongezza emisaala gy’abakozi baayo omuli aba government ez’ebitundu, abasomesa mu secondary ne primary, abakulira amasomero n’abalala.
Enteekateeka etandise n’omwaka gw’ebyensimbi guno ogwakatandika ogwa 2026/2027
Ministry evunanyiziba ku abakozi ba government eweereeddwa shs trillion 9 n’obuwumbi 708 mu mbalirira y’eggwanga ey’omwaka guno, okusasula emisaala gy’abakozi.
Omutemwa guno gwavudde ku trillion 8 n’obuwumbi 621 zebaafuna omwaka gw’ebyemsimbi oguweddeko 2025/2026.
Okutwalira awamu abakozi baayo government yabongeddemu ensimbi eziweza trillion 1 n’obuwumbi 87,obukadde 922 n’emitwalo 49.
Minister avunanyizibwa ku bakozi ba government Gen Edward Katumba Wamala, mukwogerako ne bannamulire ku ssengejjero ly’amawulire ga government mu Kampala, agambye nti emisaala gy’abakozi baayo, government ezze ezongezaako okuva ku trillion 4 n’obuwumbi 200 mu mwaka gw’ebyemsimbi 2018/2029 okutuuka trillion 9 n’obuwumbi 708 mu mwaka guno 2026/2027.
Minister Gen Katumba Wamala agambye nti abakozi abagenda okusooka okuganyulwa mu nyongereza ku misaala kuliko abamyuuka baabakulira abakozi mu district, Town council ne municipaali abayitibwa ba Deputy CAO, ne ba deputy city town clerk.
Abalala kuliko abamyuuka baba kaminsona mu ministry ez’enjawulo, abakulira ebito government abali ku ddaala erya officer U2, abakulira amasomero ga secondary ne primary wamu naabamyuka baabwe, abasomesa ba Arts mu masomero ga secondary, n’abasomesa ba primary bonna.
Abalala kuliko abakulira amatendekero agasomesa eby’emikono ku mutendera gwa TVET, abasomesa amasomo ga Arts, ba instructor ne ba tutors abayambako ku bayizi n’abalala.
Gavumenti era eyongezza emisaala gy’abakozi abavuga ebidyeri, n’abakozi abalala bonna abakolera ku bidyeri bya goverement omuli abatikka emigugu, abakola mu bya ticket, abalongoosa, abakozi abakola mu ggwanika eritereka abafudde ku malwaliro, abakozi abakuba ebifananyi mu malwaliro ga governemnt ba X-Ray attendants nabo bakwongezebwa.
Gen Edward Katumba Wamala, agambye nti abakozi abalala bakwongezebwa mu mbalirira y’eggwanga ey’omwaka gwebyemsimbi ogujja 2027/28, era nti government mu mwaka ogwo eruubirira nookutandikawo ekittavvu ky’abakozi ba government kyetuumye Pension Fund, ekinayambako okukuumira abakozi ensimbi ez’obukadde.
Minister Katumba agambye nti mu kittavvu kino government yakusasulirayo ku bakozi ebitundu 10% ku musaala gwebafuna nabo beeyongerereko ebitundu 5%.
Agambye nti baluubirira okuggyawo embeera enzibu abakozi ba government bwebawummula gyebasaanga nebakaluubiriza okufuna akasiimo kabwe, n’okulwanyisa obulyake mu bakozi nga bakyali mu government.
Bisakiddwa: Ddungu Davis
