Omuntu omu afiiridde mu kabenje akagudde ku bitaala by’e Nkumba ku luguudo oluva e Ntebbe okudda e Kampala.
Ekimmotoka ekitambuza enkokoto ezimbisibwa ekya Kampuni ya SANY Cement Factory No UAN 836D kiremeredde omugoba wakyo nekigwiira emmotoka yabuyonjo eyekika kya Mitsubishi RVR No. UBQ 371P.
Aberabiddeko ng’akabenje kagwawo bagamba nti ekimmotoka kyandiba nga kiremeredde omugoba wakyo n’asalawo akibuuse akafunvu akasalamu ekkubo, nekiremwa nekidda emabega, ekiddiridde kugwiira emu ku mmotoka ezibadde zisibiddwa ebitaala.
Emmotoka No.UBQ 371P ebaddemu munnamateeka Okiyot Raphael abadde akolera mu kampuni ya MALDES Advocates eyali eyitibwa KMT Advocates, era abadde musomesa w’eby’amateeka ku Uganda Christian University.
Okiyot Rapheal ow’emyaka 34 abadde mutuuze we Sseeta, kitegerekese nti y’abadde omwami w’omulamuzi Kwagala Faith Irene, ow’ekooti y’eddaala erisooka e Kyenjojo.
Omwogezi wa Police y’ebidduka, Micheal Kananura, naayogerera police mu Kampala neemiriraano, Patrick Onyango, bagambye nti emmotoka zombiriri zitwaliddwa ku kitebe kya Police ey’Entebe, era nga batandise n’okunoonyereza ekivuddeko akabenje..
Mu ngeri Patrick Onyango ategeezezza nti omugoba w’ekimmotoka ekivuddeko akabenje Dan Okech ow’emyaka 37 akwatiddwa, era naye akuumibwa mu kaduukulu ka police e Ntebbe.#