Ekibiina ki Peoples Front For Freedom kiwandiikidde Ssaabalamuzi w’eggwanga nga bagala bamusisinkane okunnyonyolwa ku nsonga za Rtd.Col. Dr. Kiiza Besigye, awerennemba n’emisango gy’okubeera mu lukwe oluwamba government.
Mu lukuηaana lwa bannamawulire olutudde ku ku kitebe kya PFF amyuka omwogezi w’ekibiina kino mu Buganda Dr. Phillip Lulume Bayiga agambye nti ng’ekibiina betegefu okusisinkana Ssaabalamuzi bamunyonyole ku mbeera y’omuntu wabwe.
Lulume bayiga agambye nti embeera ya Besigye bakitegedeko nti yafunyeewo olungubaanguba, oluvanyuma lw’okufuna obujanjabi.
Besigye yazirikira mu kooti, bweyali awakanya government okumuwa bannamateeka ababa bamuwolereza, oluvannyuma lwa government y’emu okuggula emisango ku Ssaalongo Erias Lukwago eyali amuwolereza ne munne Obed Lutale Kamulegeya, ng’emulanga okumanya ku lukwe lw’okuwamba government naatayogera.
