Omulangira Nakibinge asabye president Museveni okuyimbula abantu abazze bakwatibwa olw’ebyobufuzi

Jajja w’obusiraamu Omulangira Kassim Nakibinge yebazizza president Museveni olw’okwetonda olwebyo ebitattambudde bulungi mu bukulembeze bwe, wabula naamusaba okuyimbula abasibe bonna abaakwatibwa olw’ebyobufuzi.

Ategezezza nti nabali mu makomera nga betaaga okujjanjjabwa nga Edward Ssebuufu amanyiddwa nga Eddie Mutwe bawebwe obujjanjjambi obwetagisa, olwo okwetonda kwe lwekujja okukola amakulu amangi eri bannauganda.

Abadde mu makage e Kibuli gy’agabulidde abasiraamu oluvannyuma lw’okusaala Eid Adhuha mu muzikiti e Kibuli.

Omulangira Dr Kassimu Nakibinge Kakungulu asabye n’abatwala ebitongole byokwerinda obutawa basirikale biragiro byakukuba bantu, kuba amateeka gabagamba kubakuuma na bintu byabwe.

Omulangira agambye nti abantu tebandyagadde kuddamu kulaba byali mu kulonda mubaka wa Parliament omuggya owa Kawempe North, ate okulabikira mu kalulu akajja aka 2026 abakuuma ddembe gyebalabwako nga bakuba abantu emiggo ng’ente.

Asabye abakwatibwako okugamba ku basirikale bawe bannauganda ekitiibwa.

Omumyuka asooka owa Katikkiro wa Buganda Owek. Prof Twaha Kawase Kigongo yasomye obubaka bwa Ssaabasajja Kabaka..

Supreme Mufti wa Uganda Sheik Shaban Muhammed Galabuzi asinzidde wano nasaba abantu okujjumbira okuzza obugya Ndaga Muntu zabwe basobole okwenyigira mu kulonda abakulembeze ku mitendera gyonna.

Sheik Ishaka Mutengu, akulembeddemu okusoma Kutubba asabye abakulembeze okukozesa ebifo byabwe obulungi, baleke kwefuula bakitalo kuba sibebasoose okubeera mu biffo byebalimu.

############

Obubaka obuvudde mu bitundu ebirala

Busiro

Okusaala Idi e Kabalira mu Busiro okukulembedwamu Supreme Khadi wa Wakiso, Sheik Kasim Ssengoonzi bakuluηamiriza ku bubaka bwa Ssabasajja Kabaka bweyabawadde obwa Eid, ate n’okulabula abasiraamu nebanabyabufuzi obutaba babulimba nakulyazamaanya ggwanga lyabwe.

#######

Mubende

Sheikh Kulumba akulembeddemu okusaala okubadde mu Mayors Garden e Mubende asabye abayisiraamu okunyweza obumu bwabwe.

########

Gomba ne Butambala

Mu district eye Gomba, mukusaala okubadde kumuzikiti ogumanyiddwa nga Ogwomukiwalabu Katete mu muluka gwe Bulwadda mu ggombolola ye Kabulassoke, district khard owa Greater Mpigi nga yatwaala district ye Gomba, Butambala wamu ne Mpigi wansi wa Uganda Muslim supreme council, Sheikh Musa Kayongo, alabudde abasiraamu beegendereze okutambuliza ku mikutu emigatta bantu, buli nsonga ya ddiini y’obusiraamu.

##############

Mawogola Ssembabule

ABADDU ba Allah abasiraamu abakunganidde mukusaala Eid Aduha kumuzigiti ogwa Muhamedali Meghan mu kibuga kye Mateete mu Ssaza Mawogola, beebazizza Ssaabasajja olw’obubaka bweyabawadde obwesigamye kunsonga enkulu satu bwebagambye nti bwabadde bwamakulu nnyo.

Akulira Daawa e Sembabule kuludda olwe Kibuli, Sheikh Ahmad Kyessa agambye nti Ssaabasajja yakonedde ddala ku nsonga eziruma abantu naddala okusabira eggwanga engeri gyerigenda muby’okulonda okwakaasa meeme saako abo abanyigirizibwa nga bamalibwako eddembe lyabwe kko n’okubuzibwawo kyasabye kikomezebwe awamu n’abantu okwogera kwebyo byebamaze okusengejja.

Sheikh Ahmad Kyesswa avimiridde olw’ebikolwa eby’obutabanguko ebisuse mu maka.