Minister w’ebyensimbi n’okuteekerateekera eggwanga Henry Musaasizi ayanjulidde eggwanga embalirira government kwegenda okutambuliza emirimu mu mwaka gw’ebyensimbi ogujja 2026/2027 ya trillion 84 n’obuwumbi 391, essira lissiddwa kukusitula eggwanga lyonna okutambulira ku mutindo ogw’enkulaakulana y’ebibuga (Urbanisation)
Embalirira eno agisomedde mu kisaawe e Kololo parliament gyetuuziza olutuula lwayo olwaleero nga 11 June,2026, yetabiddwako n’omukulembeze w’eggwanga.
Mu mbalirira eno, governmetnt eteeseteese okukuηηaanya omusolo oguweza ensimbi trillion 45 n’obuwumbi 960.
Trillion 1 n’obuwumbi 442 zigenda kuva mu nsawo government mwetereka eziva mu mafuta g’eggwanga, sog nga trillion ezisoba mu 35, government egenda kuzeewola okuva munda mu Uganda n’ebweru w’eggwanga okuyimirizaawo embalirira eno eya trillion 84 n’obuwumbi 391.
Ku trillion 84 n’obuwumbi 391 , trillion 9 n’obuwumbi 709 egenda kuzikozesa okusasula emisaala gy’abaakozi n’ensako yaabwe.
Trillion 33 n’obuwumbi 262 bugenda kukozesebwa okuddukanya eggwanga okuli okuzimba enguudo, amasomero, amalwaliro, n’ebirala.
Trillion ezisoba mu 33, zigenda kusaasaanyizibwa okusasula amabanja n’abagoba ku mabanja government gezze yewola.
Obuwumbi 547 government egenda kuzisasula bank enkulu ey’eggwanga
Minister Henry Musaasizi agambye nti government etaddewo ensimbi eri abayiiya, bannabitone, bannamakolero, bamufuna mpola, abasuubuzi, abalimi, abalunzi nabalala, okusitula embeera ya bannauganda, kwekusaba bannauganda bakozese embalirira eno okukyusa obulamu.
Minister era alangiridde nti nga omukulembeze w’eggwanga Yoweri Kaguta Museveni bweyalangirira nti ekisanja kino tewali kwebaka, tewali bulyi bwanguzi era government etaddewo enteekateeka ez’omuzinzi okulaba nti embalirira eno etuukiriza ebigendererwa ebiteereddwamu
Enteekateeka zino kuliko okulwanyisa obuli bwanguzi, okumalawo emiwaatwa gyokwonoona ensimbi, okuziba emiwaatwa abantu mwebayitira okwepena emisolo n’ebirala.
Ebissiddwako essira
-Okusitula eby’enfuna y’abantu mu maka
-Okutumbula eby’obulimi n’obulunzi ng’abantu balima ebirime eby’okutunda
-Okutandikawo amakolero
-okutuusa obuweereza obusaanidde ku bantu
-Okunoonya obutale
-Eby’empuliziganya eby’omutindio ogwawaggulu
-Okutondawo emirimu
-Okutondawo mikisa egiyamba businesses omuli okuzimba amakubo, amasannyaaze n’ebirala
-Eby’obulamu
-Eby’enjigiriza
-Eby’okwerinda
-Empuliziganya
Mu by’entambula; Government esuubira okuddaabiriza enguudo eziwera, okuzimba ebiddyeri, nga mu kiseera kino ebiddyeri 2 byebizimbibwa ku Nnyanja Bunyonyi, era nga bisuubirwa okutandika okukozesebwa mu June 2027.
Waliwo n’enteekateeka y’okugula ennyonyi 8 okwongera amaanyi mu kampuni y’eggwanga eya Uganda Airlines, ekisaawe ky’ennyonyi ekya Kabaleega International Airport nakyo kinaatera okuggyibwako engalo, so nga ne Kidepo International Airport ali mu nteekateeka.
Mu by’obulamu; Kaweefube agenda kussibwa kukugemesa abantu endwadde, okulwanyisa endya embi, okusitula eby’obulamu bw’abakyala n’abaana, okussa eddagala mu malwaliro,okulwanyisa endwadde eziva ku nneeyisa y’abantu, saako okusaawo enkola ey’okutuusa obujanjabi ku balwadde abali obubi.
Eby’ebyenjiriza n’emizannyo; Essira lissiddwa kukusitula ebyenfuna by’abasomesa, okuteekateeka ekikopo kya AFCON, n’okuyigiriza ebayizi eby’emikono n’ebirala.
President Yoweri Kaguta Museveni mu kwogerako eri eggwanga ku mukolo guno alabudde abantu abesenza mu ntobazi n’abakolera ku nguudo okwetoloola eggwanga lyonna nti tebageza nebaddako nti kubanga omukono ogw’ekyuma gwakubakolako.
