President Yoweri Kaguta Museveni Tibuhaburwa akinogaanyizza nti tewali munnauganda yazuuliddwamu kirwadde kya Ebola munnaku 5 eziyise.
President agambye nti n’abantu ababadde baloondoolwa, bano nga baalina akakwate ku bantu abaasooka okukwatibwa ebola mu Uganda nga baali bavudde mu Democratic Republic of Congo nabo basiibuddwa nga tebalina kawuka ka Ebola.
Okutwaliza awamu Uganda yakazuula abantu 19 nga balina ebola, 14 baava mu DRC era nga bonna baali ba maka gamu, ate 5 baali munda mu Uganda naye nga baalina akakwate ku bantu abaali bavudde mu DRC.
President abadde ayogerako eri eggwanga ku mbeera ya Ebola bweyimiridde, naagamba nti bannauganda balina okubeera abagumiikiriza nti ekirwadde kino bakitudde ku nfeete, naye nga balina okusigala nga bakyewala.
Agambye nti ebola mwangu okujjanjaba okusiinga Covid 19, naagamba nti olaba bannauganda bamusimattuka ne ebola bakumwaηanga.
Wabula abalabudde nti balina okubeera abeegendereza nga beewala ebintu ebiviirako okusaasaana kwa ebola, omuli okulya ennyama y’enkima, ebiwuundo, okukwata mu ngalo nga babuuza, okwenywegera n’ebirala.
Eby’enfuma
President Museveni agumizza bannauganda nti tebasaanye kutya olwa bannauganda abakyayimiriziddwa amawanga agamu okugendayo olwa ebola gwebawulira mu Uganda, nti kino kyakiseera buseera kigenda kuggwa.
Agambye nti naabalowooza nti okuyimiriza enkuηaana mu ggwanga nti kutta eby’enfuna, nti babeere bagumiikiriza nti kubanga tewali nsimbi zisiinga bulamu.#
