Omulabirizi we Namirembe Rt.Rev.Moses Banja, akoze enkyukakyuka mu baweereza abenjawulo, era enkyukakyuka zakoze zaakutandika mu mwezi gwa June 2024.
Mu bakyusiddwa Rev.Canon Michael Ssentamu, alondeddwa okuba principal w’ettendekero lye Namugongo ng’ono addidde Eria Bbosa mu bigere.
Rev. Abel Sserwanja Mmereewooma agyiddwa e Kireka naatumibwa e Kitegomba.
Rev. Esau Bbosa Kimanje agyiddwa e Namugongo atumiddwa e Kireka.
Rev.Grace Kavuma agyiddwa e Namugongo bamutumye Bbuye – Kigoowa, era nga mumyuka ow’ebyenjiri mu bulabirizi bwe Namirembe.
Mu balala Rev. Andrew Kafeero kati amyuka Vicar wa Namugongo era chaplain wa Namugongo Martyrs Seminary.
Rev. Henry Maguuzi okuva e Kitegomba kati ye musumba omubeezi owe Nateete.
Omulabirizi era alonze Canon David Mpagi okuva mu busabadinkoni bwe Lugazi ng’omuwandiisi w’ekitongole kyebyenjigiriza mu bulabirizi bwe Namirembe.
Epafula Kaggwa Lubega omukulistaayo mu busumba bwe Kamuli ye muwanika w’obulabirizi omuggya, azze mu bigere bya Ven.Can.Isaac Mmembe Kijjambu awanise ensawo y’Obulabirizi okumala ebbanga lya myaka 25.
Okukyusa kuno Omulabirizi akukoledde mu lukiiko lw’obulabirizi bwe Namirembe olukozi lw’emiriimu olumanyiddwa nga diocesan council olutudde olwaleero kukitebe kyobulabirizi e Namirembe.
Omulabirizi akubirizza abakristaayo okwegendereza n’okwewala enjigiriza ezizze nga zisensera mpola enjigiriza ye Kanisa, eziremesa n’abantu okulya ebintu ebimu nti bya mizimu.
Omulabirizi Banja mu ngeri yeemu, asoomozezza abayimbi okumanya nti omulimu gw’okuyimba kuyitibwa era buwereza eri Katonda, era neyennyamkra olw’engeri abayimbi naddala aba Lutiiko ya Paulo Omutukuvu abayitiridde okunyooma abaweereza nga naye mwomutwalidde ng’Omulabirizi.
Olukiiko era luyisizza ekiteeso ekyokuwumuzza obukulembeze bwa choir ya Lutikko, n’abayimbi bonna, era wabeerewo okuddamu okwewandiisa eri abo abanagondera ebiragiro n’amateeka agebyokuyimba.
Omukubiriza wa Lutikko ya Paulo Omutukuvu e Namirembe era munamatteeka w’obulabirizi bwe Namirembe counsel Fredrick Mpanga, yasomye okussalawo kuno.#
Bisakiddwa: Ddungu Davis