Ekitongole ekivunanyizibwa ku bibalo ekya Uganda Bureau of Statistics, (UBOS), kyongezzaayo ennaku z’okubala abantu okutuusa nga 25 May 2024, okusobozesa abakola ogw’okubala bannauganda okumaliriza ebifo byebabadde tebannatuukamu.
Okubala bannauganda kwatandika nga 10 May,2024 era kwabadde kwakumala enaku 10 okutuusa leero nga 19 May,2024.
Wabula kizuuliddwa nti ebitundu bingi ebitanaba kutuukibwako babala, era nga n’ebyalo ebimu byali tebiteereddwamu buuma bukozesebwa mu kubala, so nga negyebwateekebwa bwasooka kubatawanya, olw’ababala abamu okuba ng’ennaku ezimu baali tebanamanyiira kubukozesa.
Mu kiwandiiko ekifulumizidwa ssenkulu wa UBOS, Dr.Chris Ndatira Mukiza, kuno kwebasinzidde okwongezaayo enteekateeka y’okubala abantu kuno okutuusa ga 25 May, 2024, mu nkola gyebayise ey’okunyikiza ebifo ebitanaba kutuukibwako.
Dr James Muwonge, omukungu mu UBOS era nga yaavunanyizibwa ku byokubala abantu mu Buganda, ategezezza CBS balina esuubi nti ebifo ebisinga byakutuukibwako olwaleero ng’olunaku olusemba, wabula nti ekiseera ekyongezeddwayo ssikyakusasulibwa nsimbi zannyongereza.m nti kuba ababala baali balina omuwendo ogw’essalira ogwali gwabaweebwa mu nteekateeka eno.
Dr. Muwonge mungeri yeemu annyonyodde nti abakozi abaamaze okubala abantu mu bitundu ebyabaweebwa n’omuwendo ogwabagerekebwa, enteekateeka eno ey’okwongezaayo ennaku, tebakwatako kuba bbo baba bamalirizza bulungi ogwabatumwa.
Bisakiddwa: Ddungu Davis
