Ministry evunanyizibwa ku ensonga zomunda mu ggwanga ekutte abantu 5 ku bigambibwa nti basangiddwa nga bakukusa abantu okubatwala e Libya, nga babasuubizza emirimu wabula olubatuusa eyo nebabawamba.
Kigambibwa nti abakukusa abantu bano olubatuusa eyo nga babaggyamu ebimu ku bitundu by’omubiri, abalala batandika okukanda abenganda zabwe ensimbi.
Abakwatte ye Gathuoth Daniel Kai, Ruai Riathinga nga bano bannansi ba South Sudan Sako Abdi Qadir Ali ye munnansi wa Somalia, abagambibwa okuluka olukwe lw’okukukusa abantu.
Kigambibwa nti basinga kutwala bannansi ba Somalia ababundabunda mu Uganda mu bitundu okuli Kisenyi , Mengo n’abalala.
Okusinziira ku kitongole ekivunanyizibwa ku ensonga zomunda mu ggwanga, ababantu abakukusibwa babadde babayisa ku nsalo ye Elegu okutuuka mu South Sudan gyebayita okutuuka mu ggwanga lya Libya.
Kigambibwa nti babatwala nga babasuubiza emirimu emisava, wabula bafundikira bagiddwamu ebimu ku bitundu byabwe ebyomubiri omuli n’okusaba abantu babwe ssente eziri wakati we mitwalo gya dollar 25,000 ne 30,000.
Basaalirwa Kigenyi okuva mu ministry ye ensonga zomunda mu ggwanga mu office erwanyisa ekikukusa bantu asinzidde mu lukungaana lwa banamawulire ku kitebe kya police e Nagguru, nategeeza nti abakwate basaba ensimbi ezo era abalemererwa okuziwaayo, babakwata ku butambi nga batulugunyizibwa ne buwerezebwa abantu babwe.
Agambye nti baliko ensisinkako ezenjawulo zebatandise okutuulamu n’abamu kubakulembeze baba Somalia mu Uganda okulaba engeri gyebanogeramu ekizivu kino eddagala.
Mu ngeri yeemu Basaalirwa ategeezezza nti waliwo abantu abalala ba 2 baakwatiddwa lubona nga baliko abantu bebakunganyizza mu bitundu bye Gomba, nga babasuubizza emirimu gy’okukola mu masamba, wabula nebatwalibwa mu mawanga abalala mungeri emenya amateeka.
Abakwatte ye Ndayisenga Piere ne Serungaya Shaban era Basaalirwa agamba nti bano bakuyambako mukunoonyereza.#
