Kooti y’eggye lya Uganda erya UPDF etudde mu kibuga Mogadishu ekya Somalia esingisizza bannamagye 2 okuli Maj John Steven Oluka 58 ne Maj Zadock Abor 49,omusango ogw’obutitiizi n’okulemererwa okukuuma bannabwe, ekyaviirako abatujju ba Alshabab okubakolako obulumbaganyi omwafiira abajaasi abasoba mu 50 mu mwezi gwa May 2023.
Okusinziira ku bujulizi obuleetedwa, ababiri bano nga 25th May 2023 baafuna okutemezebwako okuva mu Kitongole ekikessi olw’obulumbaganyi obwali busuubirwa era nga bwali buteekebwateekebwa abayeekera ba Alshabab ku nkambi ya UPDF eya Bulomera Forward Operating gyebaali baduumira mu kiseera ekyo.
Wabula abaduumizi bano nti beesuulirayo gwa Naggamba era enkeera nga 26 May abatujju ba Alshabab baakola obulumbaganyi ku nkambi eyo nebatirimbula abajaasi ba Uganda abasoba mu 50.
Ensala ya kooti etegezezza nti bano oluvanyuma lw’okuwulira nga emmundu etandise okuseka mu nkambi yabwe baalemererwa okukozesa obuyinza bwabwe okukumaakuma bannabwe basobole okulwanyisa abalabe, wabula basalawo okuddukira mu nkambi endala eya Golweny Forward Operating Base mu ngeri ey’okwetegula ekibabu ekyaviirako bannabwe bangi okuttibwa.
Ssentebe wa kooti y’amagye Brig. Gen. Freeman Mugabe oluvannyuma lw’okuwulira obujulizi obuleetedwa, wasinzidde ababiri bano n’abasalira ogw’okugobwa mu magye olwe kikolwa kyebaakola ekitaakoma kukuswaza eggye, wabula n’okuttisa bannabwe.
Brig Gen Mugambe abalagidde okujulira obutasukka nnaku 14 mu kooti yemu singa baba tebamatidde na nsala ye.
Abalala abasingisidwa emisango kuliko Cpl Okot Alex Anyatta akaligiddwa mu nkomyo yebakeyo emyaka 16, Cpl Twinemanzi Hagai emyaka 22, Sgt Obeyo Ronald emyaka 17 ate Sgt Kakooza William emyezi 10 ne nnaku 18.
Omwogezi w’amagye ga UPDF agali ku mulimu ogw’okukuuma emirembe mu ssomalia Maj Peter Mugisa ategezezza nti kooti etudde mu Somalia nefuna ekifaananyi ekituufu ku byaliwo, nga babyesigamya ku bujulizi obuleeteddwa nga bubaluma, nebasingisibwa emisango.
Bisakiddwa: Ssebuliba William
