Katuukiro wa Busoga Dr. Joseph Muvawala agambye nti enteekateeka z’embaga y’Obufumbo obutukuvu eya Kyabazinga Gabula Nadiope IV ne Ihnebantu Jovia Mutesi zitambula bulungi, era embaga yakubaayo nga 18 November,2023.
Katuukiro wa Busoga Dr.Muvawala Joseph asinzidde mu lukungaana lwa bannamawulire ku kitebe ky’Obwakyabazinga e Bugembe mu Jinja, nagamba nti abagezaako okwekiika mu mbaga ya Kyabazinga nga batambuza ebiwandiiko eby’obulimba nti bagenderera kussa bantu ku bunkenke okutuukiriza ebigendererwa byabwe eby’obulimba.
Muvawala ataangazizza nti Kyabazinga Gabula Nadiope IV tawasangako, talina mwana, takolangako mbaga yabugole, mu Uganda ne mu ggwanga eddala lyonna.
Katuukiro alabudde abatambuza ekiwandiiko eky’obulimba ekyaweereddwako ne Ssaabalabirizi w’ekanisa ya Uganda Dr. Stephen Kazimba Mugalu, ekiraga nti Kyabazinga yagattibwa dda mu bufumbo era nti alina n’abaana babiri, nti batandise okubanoonyerezaako, okumanya ebigendererwa byabwe ebityoboola Obwakyabazinga.
Agambye nti kyebagala okumanya be bantu abagala okukuba obwakyabazinga ekigwo, nga berimbika mu kufutyanka embaga ya Kyabazinga.
Katuukiro Muvawala agambye nti nga bbo abakulembeze ba Busoga, bagala abantu abatambuza ebiwandiiko ebyo byebaatwalidde Ssaabalabirizi, baleete n’ebiwandiiko ebiraga nti Kyabazinga yagattibwa mu bufumbo, baleete ebiwandiiko ebikwata ku baana 2 abagambibwa okuba nti ba Kyabazinga, baleete n’ebikwata ku mukazi agamba nti yagattibwa ne Kyabazinga Gabula Nadiope IV.
“Obusoga bukiidi, nti Bbaabba Kyabazinga Gabula Nadiope IV lweyalayira nga Kyabazinga, twava mu kooti ku ssaawa 12 netuwangula era omukolo gwabaawo” Katuukiro Muvawala
Katuukiro agambye nti waliwo omuntu akwatiddwa omu kubabadde batambuza ebiwandiiko eby’obulimba.#
