Ssaabasumba w’essaza ekkulu ery’e Kampala His Grace, Paul Ssemoogerere alambudde abasibe b’ekkomera ly’e Kitalya okubasabira n’okubatwalira ettu lya ppaasika.
Mu bya ssava Ssaabasumba byatutte e Kitalya kuliko eby’okulya, eby’okunywa n’ebirala ebikozesebwa mu bulamu obwabulijjo bibayambeko okuyita mu nnaku z’amazuukira g’omulukozi mu ssanyu.
Byaakungaanyiziddwa Abasamaliya abalungi mu ssaza ekkulu erya Kampala.
Ssaabasumba awaanjagidde essiga eddamuzi okwanguyirizaako okuwulira emisango gy’abamu ku bamulaajanidde nti bamazeeyo ebbanga ddene ddala nga tebawozesebwa.
“Tusaba abantu bano bawozesebwe, abasingisibwa emisango basibwe nga bakimanyi, abatagirina bayimbulwe, kubanga waliwo n’enjogera egamba nti okulwawo kwokuwozesa omuntu obeera ng’amummye obwenkanya”
Mu ngeri yeemu Ssaabasumba asabye akitongole ky’amakomera okukola ku nsonga y’okugaziya ekkomera lino kitangire endwadde eziyinza okuva ku mujjuzo.
Ekkomera ly’e Kitalya lyazimbibwa nga lyakukuumirwamu abasibe 2000 wabula wetwogerera nga liweza abasoba mu 2600!.
Ssaabasumba awerekeddwako Omuwandiisi omukulu ow’essaza Rev Fr. Pius Male Ssentumbwe, bwanamukulu wa lutikko Rev Fr. Achilles Mayanja Ssali, Omukwanaganya w’amawulire mu ssaza Rev Fr Joseph Mukiibi n’omuyambi we Rev Fr. Nicholas Mulumba ne Fr. Denis Ssebuggwawo bwanamukulu w’ekigo ekkomera gyerisangibwa.
Bisakiddwa: Kamulegeya Achileo K