Police etandise okunoonyereza ku buvune president w’ekibiina ki National Unity Platform bwafunye, mu kavuvungano akabaddewo wakati w’Abawagizibe ne police e Bulindo mu Kira municipality mu district ye Wakiso leero nga 03 September,2024.
Police ng’eyita mu mwogezi waayo Kituuma Rusoke, egamba nti Robert Kyagulanyi Ssentamu yeetabye bulungi mu kusaba okubadde okwokwebaza katonda olw’obuweereza bwa Munnamatekaawe George Musisi, era omukolo guno guwedde mu ddembe.
Police egambye nti mukolo oluwedde Robert Kyagulanyi Ssentamu ne banne nebasiibula, wabula batandikiddewo okukuba Olukungaana mu luguudo olutabadde mu mateeka, ekigiwalirizza okukozesa omukka ogubalagala okugumbulula ababadde balweetabyeemu.
Kiteeberezebwa nti mu kavuvungano kano Omukulembeze wa National Unity Platform Robert Kyagulanyi Ssentamu afunye ekisago ku Kugulu, abawagizibe kyebagambye nti libadde ssasi.
Kyagulanyi Ssentamu oluddusiddwa abawagizibe mu mmotoka buyonjo atwaliddwa ku ddwaliro lya Najaeem Medical Centre e Bulindo okufuna obujjanjabi, Oluvannyuma natwaalibwa mu ddwaliro e Nsambya okufuna Obujjanjabi.
Kituuma Rusoke omwogezi wa police mu ggwanga, ategeezezza nti bakufulumya alipoota enzijuvu nga bamaze okunoonyereza n’okwetegereza byonna ebiddiridde mu kavuvungano ako.#
