Police ekutte omukulu wesomero amaze emyaka ebiri ng’anoonyezebwa ku bigambibwa nti yawa abayizi ba P.7 ebibuuzo eby’akamalirizo ebyekicupuli ng’abalimbye nti byali bivudde ku kitongole ky’ebigezo ekye ggwanga ki UNEB.
Akwatiddwa ye Wafula Ivan owemyaka 34 nga mukulu wasomero lya Earnest Nursery and Primary school, erisangibwa e Kisugu mu division ye Makindye mu Kampala.
Kigambibwa nti mu mwaka 2020 Wafula yawandiisa abayizi b’essomero lino ab’ekibiina ekyomusanvu, okukola ebibuuzo by’akamalirizo ebya PLE, wabula ebibuuzo nga binaateera okutuuka,abayizi yabajja ku ssomero nabatwala mu kifo ekitaategerekeka mu bitundu bye Busia gyeyabaweera ebibuuzo byebaakola.
Oluvanyuma lw’ebibuuzo, abayizi baakomezebwawo e Kampala era ne bawebwa bazadde bwabwe.
Ng’ebivudde mu bigezo bya UNEB bikomyewo, Wafula Ivan naye yayita abayizi be era nabawa ebiwandiiko ebiraga nti bakola ebibuuzo ne bayita bulungi, era abayizi byebaakozesa okugenda okusaba ebifo mu masomero ga siniya.
Mu mbeera eno abayizi baagenda ku masomero ganjawulo, era mu 2024 abamu kubayizi bano abaali ku ssomero lya Ebenezer Secondary School, basaba abayizi bano okuleeta ebiwandiiko bya P.7 ebiri original, basobole okwewandiisa okukola ebibuuzo bya siniya 4.
Bwebaagenda ku ssomero Wafula yalemererwa okuwa abayizi ebiwandiko ebiri original era ebituufu.
Baddukira ku police neetandika okunoonyereza kwayo okutuuka mu UNEB, kwekukizula nti abayizi ebibuuzo byabakola tebyali bya UNEB ebyakolwa abayizi mu ggwanga lyonna mu mwaka 2020.
Omwogezi wa police mu Kampala n’e miriraano Patrick Onyango agambye nti Wafula Ivan akwatiddwa era wakuyambako police mukufundikira okunoonereza kwayo ku ensonga eno.#
