Parliament ebadde ekubirizibwa sipiika wa Parliament Anitah Annet Among, amwogeddeko ng’omubaka abadde tasosola mu bantu bonna, era nga bangi bamusaamiddwa omuli n’abawagizi ba NRM wadde abadde ku ludda oluvuganya government mu kibiina ki NUP.
Sipiika Among agambye nti wakusasulira Mulekwa ebisale by’essomero okutuuka wanaamalira senior eyokuna ku ssomero gy’abadde erya Kibuli SS, nga kino akikoze okuyita mu Bukedea and Magogo foundation.
Buli mubaka aweereddwa akazindaalo ayogedde ku Hellen Nakimuli ng’abadde akwatagana na buli muntu era nti kibadde kizibu okumusanga ng’anyiize.
Bamwogeddeko ng’abadde alwanirira ensonga ezikwata ku bantu bokubizinga baabadde akiikirira, saako okuwanika bendera ya Uganda mu by’emizannyo egyetabiddwamu parliament ya Uganda, naddala omuzannyo gwa Volley ball gwabaddemu nga Captain wa parliament.
Ekiteeso ekisiima Hellen Nakimuli kyanjuddwa Ssaabaminister wa Uganda Robinah Nabbanja, ayogedde ku mugenzi Nakimuli ng’omukulembeze abadde ayagala eggwanga lye, ngera akoze nnyo okutumbula ebyenkulakulana mu bizinga bye Kalangala.
Alwaniridde ebyenjigiriza,alwanirira omwana omuwala, okuwabulanga government ku nsonga ezitali zimu, okuwanirira ebyemizanyo n’ebirala.
Minister omubeezi ow’ebyemizannyo Peter Ogwang waleetedde ekiteeso okusaba ababaka buli omu asalibweko shs emitwalo amakumi ataano (500,000) ogw’omwezi guno ogwa April 2026,kiyambeko ku by’okusoma kwa mulekwa.
Agambye nti Hellen Nakimera y’abadde aweerera muwala we ku ssomero, n’olwekyo nti sknga parliament temukwatizaako ebyensoma ye biyinza okugootaana.
Wano Sipiika Among ataddewo ekibuuzo oba ababaka bakkiriziganya n’okusaba kuno, era gyebigweredde nga ababaka abasinga obungi bakiwagidde
Ababaka mu parliament okubadde akulira oludda oluwabula government Joel Ssenyonyi kko n’omubaka wa parliament y’obuvanjuba bwa Africa Veronica Kadogo, boogedde ku mugenzi ng’omubaka abadde awanise bendera ya Uganda mu bwengula mu byemizannyo, era bwatyo Ssenyonyi naasaba government okussa mu nkola ebirubirirwa by’omugenzi nga eyita mu kusitula ebye emizannyo.
Oluvannyuma lw’okusiima emirimu gy’abadde omubaka Hellen Nakimuli,omulambo gwe gutwaliddwa ku kitebe kye kibiina ki NUP mwabadde ava, bannakibiina bamukubeko eriiso evvanyuma.
Ku Thursday nga 23 April,2026 wakusabirwa ku eklesia e Namungoona n’oluvanyuma atwalibwe e Luweero ku bijja bya Bajajaabe gyanaziikibwa olunaku lwe lumu.
Bisakiddwa: Nabagereka Edithie
