Wabaddewo ddukaduka mu kitundu kye Lwemiyaga e Ssembabule, abawagizi b’abesimbyewo ku kifo ky’omubaka wa parliament ow’ekitundu, ab’omubaka aliyo Theodore Ssekikubo naba Brig. Emmanuel Rwashande owa NRM, bwebagwanganye mu malaka.
Amagye ne police gakubye amasasi okubagugumbulula ababadde balwanagana, okukkakana ng’omuntu omu akubiddwa essasi natwalibwa mu ddwaliro ng’embeera mbi.
Bino bibaddewo nga Ssekikuubo agenda okusisinka abawagizi be ku kyalo Milyango e Lwemiyaga Ssembabule.
Okusinzira ku omu kubabaddewo, akubiddwa essasi ye Mutyaba George era nga ono addusiddwa mu ddwaliro e Masaka nga biwala ttaka.
Omubaka Theodore Ssekikubo avumiridde ekikolwa kino era naasaba police okumuwa obukuumi obwenjawulo, nti kubanga atambulira mu kutya.
Wabula Cbs bwetuukiridde Emmanuel Rwashande okubaako byatangaaza ku mbeera eno, agambye nti abadde talina kyamanyi ku bulumbaganyi obukoleddwa ku Ssekikubo n’abawagizi be.
Omwogezi wa police mu bendobendo erye Masaka Twaha Kasirye agambye nti batandise okunoonyereza ku bibaddewo e Lwemiyaga, balyoke bakole alipoota enzijuvu.
