Omulamuzi David Matovu yaasalidde ababiri bano, oluvannyuma lw’okukkiriza n’okwewaako obujulizi nti bebatta Eng.Daniel Bbosa, olwa Luggya Tabula okweyagaliza obukulu bw’ekika.
Ettemu kino lyaliwo nga 25 February,2024 ku kyalo Kikandwa mu muluka gwe Lungujja mu gombolola ye Lubaga mu Kampala, ng’omutaka yali anaatera okutuuka mu maka ge.
Luggya Noah yategeeza kooti, nti yeyasasira Omutaka amasasi agaamuttira mu mmotoka ye, oluvannyuma lw’okumulondoola okumala ekiseera ku biragiro bya kitaawe omuto Luggya Bbosa Tabula era nti yeyamufunira n’emmundu gyeyakozesa.
Luggya Bbosa Tabula yategeeza Kooti nti yali amaze ekiseera ng’aluka olukwe olutta Lwomwa Eng.Daniel Bbosa, olw’okwesasuliza ku kitaawe gw’agamba nti naye yattibwa mu ntalo za kika.
Ku lunaku lweyattibwa (25 Feb,2024) Omutaka yali ava ku mikolo gy’ekika e Katosi, era nga mu mmotoka yalimu ne mukyala we Gladys Kakeedo, n’omuwala eyali abayambako ku mirimu ewaka.
Abatemu bajja babalondoolera ku pikipiki, wabula baba banaatera okutuuka ewa, kwekuseemberera emmotoka olwo Luggya Noah naasikayo emmundu naatandika okusasira Omutaka amasasi agaamutta.
Wabula abadduukirize baatuuka mangu nebakwata Luggya Noah nga tanaboomba.
Luggya Bbosa Tabula atulise naakaaba, ng’agamba nti busungu bwebwamuleetera okutta omutaka, olw’okuba nga kitaawe naye nti yattibwa buttibwa olw’entalo z’ekika.
Yegayiridde mukyala w’omugenzi nti amusonyiwe, naalajanira ne Kabaka wamu ne president w’eggwanga nti bamuddiremu.
Wabula Omulamuzi amutegeezezza nti omusango gwebaakola ogw’okutta omuntu baali baaguteekateeka okumala ebbanga ddene okuguzza, era nebakikola, kale nga n’olwekyo nabo balina kuttibwa okukola ng’ekyokulabirako eri abantu abalala abatta banaabwe.
Omulamuzi.Matovu agambye nti ettemu lino teryalumya bamumaka n’aboluganda lwa Eng.Daniel Bbosa bokka, wabula lyakosa ekika ky’Endiga kyonna, Obwakabaka bwa Buganda n’abantu abalala bangi, kwekubasindika ku Kalabba nabo battibwe.
Abantu abalala 3 abavunaanibwa ku musango gwe gumu okuli Nakiguli Harriet, Nakabake Joseph ne Mayanja Ezra omusango baagwegaana, era kooti etaddewo olwa nga 08 September, 2026 okutandika okuwulira ensonga zabwe mu bujjuvu.
Bisakiddwa: Betty Zziwa
