Obubaka obw’okulwanyisa enguzi, okukuuma emirembe, banna Uganda okuba n’obuntu bulamu eri abalala, obumu, n’okufaayo ku balala, bwebumu ku bubaka obwefuze okubuulira n’okwogera kw’abantu abenjawulo abeetabye mu kusaba kw’okujjukira olunaku lw’abajulizi e Namugongo mu bakulisitaayo.
Mu bubaka obulala mwemubadde okusaba government ne parliament eye 12, okuyisa ebbago ly’etteeka eriruηamya ku nkola ya yinsuwa yeebyobulamu bwa bannansi erikyali mu bubage, erimanyiddwa National Health Insurance Bill 2019.
Abadde omugenyi ow’enjawulo ku lunaku ljno, minister omuggya avunanyizibwa ku bakozi ba government, Gen Edward Katumba Wamala, agambye nti kisaanidde banna Uganda bonna okukulemberamu okulwanyisa enguzi efuukidde eggwanga ekizibu.
Ssabalabirizi w’ekkanisa ya Uganda, Dr. Samuel Steven Kazimba Mugalu, nga yakulembeddemu okubulira enjiri, asabye banna Uganda okuba n’omutima ogusiima kyebatuuseko, okugoberera enkola ey’okuteesa nga waliwo obutakaanya n’okunnyikiza obumu.
Amyuka ssenkulu wa ssetendekero wa Uganda Christian University, (UCU), abateeseteese ebikujjuko bino omwaka guno, Prof Aaron Mushengyezi, agambye nti bafubye okutereeza ekifo kye Namugongo, omubadde okusiiga langi ku bizimbe, okukola amakubo okwewala ebisooto, okusimba omuddo abantu webanaatuula, okukola ebitaala ebikozesa amaanyi g’enjuba (Solar), amazzi amayonjo, n’okuddaabiriza obuyumba obukyamirwamu nga bwamutindo.
Mu kwogerakwe Prof. Mushengyezi, asabye ekkanisa okwongera okussa obubaka obukwata ku bajulizi ku mikutu egyenjawulo egyettanirwa abavubuka n’abaana, okubaagazisa ebikwata ku bajulizi okukuuma omukululu kuba nabajulizi baali mu myaka mivubuka.
Emikolo gy’olunaku lw’abajulizi olw’omwaka guno 2026 bitaataaganyiziddwa ekirwadde kya Ebola era bitegekeddwa mu nkola ya science, ng’abantu abali 200 be bokka abakkiriziddwa e Nnamugongo abalala baalagiddwa kusabira mu bitundu byabwe, so ng’abalamazi abaali batandise okutambula nga bava mu mawanga ag’omuliraano babalagira okuddayo ewabwe, okwewala okusaasaanya ekirwadde naddala okuva mu Democratic Republic of Confo
Obuwumbi bwa shs 3 bwebwasaasanyiziddwa mu kutegeka emikolo gino omwaka guno, era president Museveni yagenda okuyimiriza ebikujjuko bino ng’ebintu ebiinga byali biwedde okutegeka.
Obuwumbi bwa shs 2 bwavudde mu government eyawakati ne UCU neteekako akawumbi kamu okukola enkulakulana etereddwawo omwaka guno.
Ssaabalabirizi Kazimba Mugalu alangiridde nti ssetendekero wa UCU, yagenda n’okutegeka ebikujjuko bino omwaka ogujja 2027 nga 3 June e Namugongo ku bakulisitaayo.
Bisakiddwa: Ddungu Davis
