Omulamuzi Alice Komuhangi Khawuka yataddewo olunaku luno, oluvannyuma lw’okuwulira Okwekennenya okukoleddwa abantu ab’ensonga (Court Assessors).
Ba Court Assessors bonna bategeezezza omulamuzi nti engeri gyebawulirizaamu n’okwekenneenya ensonga, tebalina kakunkuna konna, balaba ng’obujulizi bwonna obuleeteddwa bumala okuluma Christopher Okello Onyum nti yeyatta abaana.
Wabula munnamateeka wa Okello Richard Kumbuga, agambye nti omuntu we olw’okuba nga yali yatwalibwako mu ddwaliro ly’abaliko akamogo ku bwongo e Butabika emyaka egiyise, ate ng’alina n’obulwadde bwa Nalubiri (Sickle cell), byandiba nga byebyamuleetako ekikyamu ku bwongo olw’okubeera ku ddagala ebbanga eddene.
Kumbuga agamba nti oludda okuwaabi lwalemereddwa okuleeta ebbaluwa ezikakasa ensonga ezaatwazisa Okello e Butabika, okusinziira ku bujulizi obwaleetebwa ow’oluganda lwa Okello.
Okello mu kwewozaako naye agamba nti abaana 4 beyatta teyakikola mu bugenderevu, nti wabula waliwo ekyamwambala obwongo, nekimuviirako okutta amabujje.
Wabula oludda oluwaabi olukulembeddwamu Johnathan Muwaganya lulumiriza nti Okello mulamu era obwongo bwe bukola bulungi, era naasaba omulamuzi amuwe ekibonerezo ekimusaana.
Bisakiddwa: Betty Zziwa
