Obwakabaka bwa Buganda buwakanyizza Ebbago ly’Etteeka eriwa Uganda Obwetengereze, erimanyiddwa nga Protection of sovereignty Bill 2026, singa liyisibwa nga terikoleddwamu nnoongosereza nti lya bulabe nnyo eri ensi Buganda ne Uganda eya wamu.
Bwabadde ayogerako eri bannamawulire mu Bulange e Mengo, Ssaabawolereza w’Obwakabaka Owek.Christopher Bwanika ategeezezza nti okuwakanya etteeka lino tekyesigamiziddwa ku ludda mu by’obufuzi, wabula okulaga nti Obwakabaka bulina obwetengereze okunoonya obuvujjirizi obwenjawulo okuva mu mikwano gyabwo ebweru wa Uganda, abantu baabwo okuva ebweru wa Uganda ne munsi yonna.
Owek Bwanika agambye nti ebimu ku birowoozo Obwakabaka byebwawaddeyo ku bbago lino byakiraze mu lwatu, nti Abaganda ne banna Uganda abali ebweru wa Uganda bakwasizaako government mu kutumbula Ebyobulamu, Ebyenjigiriza n’Enkulaakulana endala, byagambye nti byoolekedde okusaanawo ng’abantu n’ebitongole batya okuweereza ensimbi okuva e bunaayira.
Owek Bwanika agambye nti ebbago lino teriggyayo kigendererwa bantu kyebaagala ku bwetengereze bw’eggwanga, kuba likosa eddembe ly’Obuntu , Ebyenfuna by’abantu n’eggwanga, era nti ligenda kuttattana enkola ya Mwoyo gwa ggwanga Demokulaasiya.
Obwakabaka buwabudde nti obumu ku buwaayiro obuli mu bbago lino bulagira abantu okwanika ebyama by’abwe ,naddala mu by’ensimbi ekintu ekinyigiriza ennyo.
Minister avunaanyizibwa ku Kabinenti, Olukiiko ne wofiisi ya Katikkiro Owek.Noah Kiyimba, asabye government obutateeka bya bufuzi mu nsonga eno, nti kubanga ereese okwennyamira mu mitima gya bannauganda abali mu mawanga amalala, olw’etteeka lino okubooleka ng’Abagwira abatali bannauganda, so nga nabo balina enkulaakulana gyebatadde mu ggwanga lyabwe ,omuli okuzimba ebizimbe n’okulaakulanya ewabwe gye basibuka n’okulabirira abantu babwe ku nsimbi zebakola mu mawanga amalala.
Abantu abenjawulo n’Ebitongole ababadde bayitibwa mu kakiiko ka parliament akekeneenya ebbago lino, batutteyo ebirowoozo ebisimbira ekkuuli ebbago lino.
Abakulu okuva mu banka ya Uganda enkulu abaakulembeddwaamu Governor waayo Michael Ating Ego ne Inter religious council of Uganda baawakanyizza ebbago lino, nga bagamba ssinga lifuulibwa etteeka, lyakukosa nnyo Uganda mu byenfuna.
