Obwakabaka bwa Buganda buwaddeyo obukadde bwa shs 172 okudduukirira omulimu gw’okuzimba ekifo ewajanjabirwa abagudde ku bubenje mu ddwaliro lye Nkozi ki Nkozi Hospital Accident and Trauma center.
Ensimbi zino zezimu ku nsimbi ezaava mu kijjulo kya CBS Kaliisoliiso Dinner ekya 2023, ekyali ku Speke Resort e Munyonyo.
Katikkiro wa Buganda Charles Peter Mayiga bw’abadde akwasa abakulira eddwaliro lino cheque y’ensimbi zino obukadde 172, Katikkiro akubirizza abantu bongere okusosowaza eby’obulamu nga bwebakola mu nteekateeka zabwe endala.
Katikkiro asabye government ewagire kaweefube ono nti kubanga ayamba buli muntu awatali kusosola.
Obuwumbi bwa shs musanvu (7) bwebwetaagibwa okumaliriza omulimu guno.
Era agisabye eyongere okuvujjirira eby’obulamu ensimbi ezimala, n’agamba nti abantu abalamu obulungi bebasobola okukulaakulanya eggwanga nga bawa omusolo n’okwenyigira mu nteekateeka endala.
Munsonyooli Charles Kasibante ku lwa Nkozi Hospital yebazizza Radio ya Beene CBS fm n’Obwakabaka olwokubeera ensaale mu kusitula embeera zabantu, nga eyita mu ntekateeka ezenjawulo.
Kaliisoliiso Dinner etegekebwa Obwakabaka bwa Buganda okuyita mu programme ya radio CBS FM eya Kaliisoliiso w’emizannyo, eweerezebwa ku mpewo okuva ku monday okutuuka ku Friday, ku ssaawa emu n’ekitundu eyokumakya okutuuka ku ssaawa bbiri.
Eweerezebwa Hajji Abby Mukiibi, Hajji Abbu Kawenja, Peace Dian ne Rajab Kanaakulya.
Ssenkulu wa CBS Omuk Michael Kawooya Mwebe yeebazizza olukiiko olufuzi olwa Radio ya Beene CBS olukulemberwa Omuk. Mathias Katamba, olwokuwaayo obudde obumala abantu ba Kabaka okufuna obuyambi obutali bumu mu byobulamu n’entekateeka endala.
Beatrice Lugalama okuva mu Centenary Bank ku lw’abavujjirizi ba Kaliisoliiso Dinner omuli Rotary, Legends, BBS Terefayina n’abalala, agambye nti bakusigala nga bawagira enteekateeka eno, nebeebaza CBS olw’okubawa omukisa okuwagira eby’obulamu.#
