Ttiimu y’essaza Butambala eyongedde okulaga amaanyi mu mpaka za Masaza ga Buganda ez’omupiira ogw’ebigere ez’omwaka guno 2026, bwerumbye Bugerere omwayo mu kisaawe e Ntenjeru n’egikubirayo goolo 2-1.
Butambala yenywerezza ku ntikko y’ekibinja Muganzirwazza n’obubonero 10, ate nga Bugerere esigadde ku bubonero 05.
Omupiira guno gwetabikdwako Mugerere Samuel Ssemugooma nabamyukabe awamu ne Katambala Al Hajji Magala Sulaiman nabamyukabe.
Mu kibinja kye kimu Muganzirwazza, Kkooki ekubye Kabula goolo 1-0 e Kyotera, ate nga Ssingo egudde maliri ne Mawogola goolo 1-1 e Mityana.
Mu kibinja Masengere, Gomba erumbye Bulemeezi omwayo n’egikubirayo goolo 1-0 eteebeddwa Meddie Kasule mu kisaawe kya Kasana Luweero.
Mu mipiira 4 Bulemeezi yakafunayo akabonero kamu kokka.
Mu kibinja kye kimu Busiro nayo ewangudde omupiira ogusooka bwekubye Mawokota goolo 1-0 mu kisaawe e Nabbingo.
Mu kibinja Bulange, Buddu ekubye Buvuma goolo 1-0 e Masaka.
Buweekula nayo ewangudde omupiira ogusooka bwekubye Busujju goolo 1-0 e Mubende.
Kyadondo ewangudde omupiira ogusooka bwekubye Buluuli goolo 1-0 e Wampeewo.
Buddu kati ekulembedde ekibinja Bulange n’obubonero 10, Butambala nayo ekulembedde ekibinja Muganzirwazza n’obubonero 10 ate nga Kyaggwe ekulembedde ekibinja Masengere n’obubonero 09.
Bisakiddwa: Isah Kimbugwe
