Parliament ekkiriza ababaka ba parliament bannakibiina ki NRM ab’endowooza y’ekisinde ki Patriotic League of Uganda, okubaga ebbago erireetawo ennongasereza mu tteeka erifuga parliament erya Administration of Parliament Act, okukyuusa engeri akulira oludda oluvuganya government gyalondebwamu nookulambika engeri gyagobwamu
Bagala ne ba minister ab’oludda oluvuganya government bakubwemu ttooki nga tebanatandiika mirimu, nga bwezikolebwa ku ba minister ba government eri mu buyinza
Ekiteeso kino kyanjuddwa omubaka wa Buyaga West Denis Namara, nekisembebwa ababaka okuli owa Kibanda North Linos Ngompeke,n’ owa Kanyum Okwalinga Simon Peter.
Bagala akulira oludda oluvuganya government akubweko akalulu ebibiina by’obufuzi byonna eby’oludda oluvuganya government n’ababaka abali mu parliament abatalina bibiina kwebaajjira.
Denis Namara bwabadde asaba parliament olukusa okumukkiriza okubaga ebbago lino ,agambye nti eggwanga lyetaaga akulira oludda oluvuganya government abeere nga babaka banne bonna ku ludda oluvuganya government bamulinako obuyinza SSo SSI alondeddwa ku kitebe ky’ekibiina ekisiinga ababaka abangi.
Agambye nti ng’abakulu abalala okuli sipiika n’omumyuka we, ba commissionner ba parliament balambikiddwa mu nnonda yabwe n’okugobwa, era naakulira oludda oluvuganya government alina okulambikibwa engeri gyagobwamu.
Simon Peter Okwalinga abuulidde parliament nti ng’ababaka,bagala okuwa ebibiina by’obufuzi ebirala ebiri ku ludda oluvuganya government omwagaanya nabyo eddoboozi lyabyo liwulirwe mu kusalawo ku bukulembeze bw’oludda oluvuganya government, SSo SSI nga bwekiri mu kiseera kino nti ekibiina ekikulembera oludda oluvuganya government kyekisalawo byonna.
Nampala wa FDc mu parliament era omubaka omukyala owa district ye Soroti, Anna Adeke ne Joseph Gonzaga Ssewungu basimbidde ekkuuli ekiteeso kino nti kittattana omutima gw’ebibiina ebingi.
Wabula ababaka abangi bakkiriza ababaka bano okugenda mu maaso n’okubaga ebbago lino.
Kinnajjukirwa nti ebbago lyerimu lyasooka kwanjulwa mu palament eye 10, eye 11 nga nakati likomyeewo mu parliament eye 12, nga lyonna ligendereddwamu okukyuusa engeri akulira oludda oluvuganya government gyalondebwamu, akubweko akalulu ababaka bonna abooludda oluvuganya government.
