Katikkiro wa Buganda Owek Charles Peter Mayiga asabye abakulembeze b’abavubuka mu buweereza obwenjawulo obutakulembeza byanfuna, wabula bakolerere Uganda eyenkya.
Akuutidde abavubuka okukola n’obuyiiya ate n’okusiga ensimbi zabwe n’obuvunaanyizibwa, nga bakimanyi bulungi nti obuvubuka ssibwa lubeerera.
Katikkiro abadde asisinkanye abakulembeze b’abavubuka mu bibiina bya Nkobazambogo mu bukiika kkono bwa Uganda, babadde ku Hotel Boma mu Kibuga Gulu.
Asabye abakulembeze okukola okusalawo okwensonga ku bintu ebizza Uganda mu maaso, okusinga okuwuliriza ebigambo ebibamalamu essuubi.
Abakalaatidde nti mirimu gy’Obwakabaka gyetaaga bujjumbize era nti obukulembeze ssi kitiibwa wabula buweereza era nti omukulembeze tawugulwa.
Katikkiro mu ngeri yeemu asabye abakulembeze b’abavubuka okukomya okukaabirira abantu ebizibu byebasanga mu buweereza, wabula bakole ekisoboka okubivvuunuka.
Minister w’Abavubuka ebyemizannyo n’Ebitone Owek Ssalongo Robert Sserwanga, ajjukizza Abavubuka Obuvunaanyizibwa bwebalina obw’okusitula ebyenfuna by’Eggwanga, nga bayita mu kulima, okulunda n’Okutereka ensimbi mu bittavvu ebirina akakwate n’Obwakabaka.
Katikkiro bw’amaliriza okulambula abavubuka mu bukiika kkono bwa Uganda, addako kusisinkana bakulembeze ba Nkobazambogo mu Busoga.
Katikkiro awerekeddwako minister wa government ez’ebitundu era nga yavunaanyizibwa ku bantu ba Kabaka abali ebweru wa Buganda, n’abakulembeze ku Lukiiko lw’Abavubuka mu Bwakabaka olwa Buganda youth council.
Bisakiddwa: Kato Denis ne Kibuuka Fred
