Kibadde kijjobi ku lusozi lw’omutukuvu Noah e Kiyinda Mityana, abakristu mu kigo kya Mityana cathedral parish bwebabadde bajaguza okuweza emyaka 60 kasookeddenga bafuna ekigo.
Wabula ekisinze okufuula ebikujjuko bino ebyenjawula y’essaala eyenjawulo etereddwawo okusabira Nnyininsi eno Ssaabasajja Kabaka okuweza emyaka 31 ng’alamula obuganda.
Ebikujjuko bino bitandise na kitambiro kya misa nga kiyimbiddwa omusumba w’essaza lya Kiyinda Mityana Bishop Anthony Zziwa.
Omusumba Zziwa agambye nti enkolagana ennungi wakati wa ekereziya n’Obwakabaka ebayambye okutumbula obuweereza obuwera, era n’asaba nti nga tujaguza emyaka 32 enkolagana eno ey’okusabira Nnyinimu mu masinzizo gonna esaanidde ekuumibwe.
Obwakabaka bwa Buganda bukiikiriddwa minister wa government ez’ebitundu Owek.Joseph Kawuki nga yasomye obubaka obuvudde embuga, oobwamatikkira, era akubirizza abantu ba Kabaka okwongera okunyweza obumu nga kyekinatwala buganda mu maaso.
Minister w’ebyensimbi mu Uganda Matia Kasaija akiikiridde Ssaabaminister Robinah Nabbanja, agambye nti government esiima ebikolebwa essaza lya Kiyinda Mityana n’omusumba Zziwa n’agamba nti akoze kinene okuyamba government mu kutumbula ebyobulimi n’obulunzi mu bakristu.
Bwana mukulu wa Mityana cathedral parish father Stephen Lusiba yebazizza abantu abayambye ekigo kino mu ngeri zonna okulaba nga kitambuza emirimu.
Okusinza kuno kwetabiddwamu abantu banji okubadde minister w’ebyettaka mu ggwanga Judith Nabakooba, Kasujju eyawummula Owek. Mark Jjingo Byekwanso Kaberenge II, Ssentebe wa Buganda Twezimbe omukungu John Fred Kiyimba Freeman n’abalala.
Bisakiddwa: James Kaana Ssebuguzi.
