Kamalabyonna wa Buganda Charles Peter Mayiga asabye abaami ba Ssaabasajja Kabaka ku mitendera egyenjawulo okubeera abagonvu eri Namunswa, nga bateeka mu nkola ebiragirobye byonna awatali kumutiiririra, n’okulaba ng’obuweereza bwabwe tebuyuuzibwayuuzibwa.
Katikkiro abadde asisinkanye abaami b’amagombolola ku Muganzirwazzan’abategeeza nti ekitiibwa kya Ssemunywa tekigenda kuyuuzibwa abantu ab’Olubatu, naasaba abaami okugumira ebisomooza byonna.
Katikkiro abagumizza nti ng’akyakutte Ddamula tagenda kukkiriza kitiibwa kya Namulondo kuyuuzibwayuuzibwa, Wadde okutiisa abaami ba Kabaka ku mutendera gwonna.
Katikkiro asabye abaami ba Kabaka obutawa budde bantu boogera byebatamanyi ku Bwakabaka ,naabasaba amaanyi bagateeke ku kukuuma ebyobugagga by’Obwakabaka ku mbuga zaabwe.
Ku mbeera y’ebyobufuzi etandise okukyuusa abantu endowooza, abawadde gaabuwa beetegereze abefuula abaagala Buganda nga tebagiriiko.
Minister wa government ez’ebitundu Owek Joseph Kawuki asabye abaami ba Kabaka bonna abaweebwa obuvunaanyizibwa okuweereza , okubeera abeerufu mu nkola y’Emirimu olwo obuweereza bubanyumire.
Abamu ku baami ba Ssaabasajja abeetabye mu nsisinkano eno beeyamye okusigala nga bawulize eri obukulembeze bwa Ssaabasajja Kabaka, n’okuyambako abantu b’Omuteregga okukulaakulana.
Bisakiddwa: Kato Denis
