Olutalo lw’okulwanyisa enguzi n’okunonyereza ku nsasaanya y’ensimbi mu parliament ya Uganda lwongedde okukaluba, kaliisoliiso wa government Betty Olive Namisango Kamya Turyomwe, agambye nti waliwo ebitongole ebikyekiise mu nteekateeka eno.
Akulira oludda oluwabula government Joel Ssenyonyi, yawandiikira kalisoliiso wa government Betty Olive Namisango Kamya Turyomwe, ng’amusaba atandike okunoonyereza ku ngeri ensimbi gyezisaasaanyiizibwa mu parliament.
Waliwo n’omwoleso gw’okumutimbagano ogumaze ebbanga gwoleka engeri parliament gyediibudamu ensimbi awatali akuba ku mukono.
Kalisoliiso wa government Betty Olive Namisango Kamya Turyomwe agambye nti waliwo ebitongole ebyamusooka okunoonyereza, nga kikyali kizibu naye okutandika ku nsonga eno.
Agambye nti balina omukutu ogutaba ebitongole ebinoonyereza ku bulyake ebyenjawulo okuli ssabalondoozi w’ebitabo bya government, Anti Corruption Unit mu maka gobwa president nebirala nga ssinga ekimu kisookayo mu kunoonyereza ku nsonga yeemu, ekirala kirina okulindako kinaakyo kimalirize.
Betty Kamya agambye nti Joel Ssenyonyi, akulira oludda oluwabula government yagenda okuwandiikira IGG nga wawaliwo ebitongole ebyasooka okukwata ku kunonyereza kuno, era ye kimukalubiiridde okubaako kyanoonyereza, ku nkwata ya ssente mu parliament.
Bino webijjidde nga president Museveni yalaangiridde okuggula olutalo ku bantu abalemedde mu ky’okukolokota Sipiika wa Parliament Annet Anita Among, nti bebamulemesa okutuukiriza emirimugye obulungi.
President yabadde aggulawo eddwaliro n’ettendekero ly’basawo e Bukedea ebyazimbiddwa Sipiika Annet Anita Among.
Bisakiddwa: Ddungu Davis
