Bishop Silvester Kisitu owa Orthodox Church atwala ekitundu ky’e Jinja, asoomozezza abantu ba Uganda okwettanira okukozesa ebintu byaffe eby’obuwangwa mu bulamu obwa bulijjo, bireme okutwalibwa ng’ebya sitaani.
Bishop Kisitu yakulembeddemu okubuulira ku mukolo gw’amazaalibwa ga Ssaabasajja Kabaka Ronald Muwenda Mutebi II ag’emyaka 71, agakwatiddwa ku eklesia ya St.Nicholas e Namungoona.
Agambye nti abantu balina okukomya okwerimbika mu ddiini, nebavvoola obuwangwa.
“Abantu balina okuba n’obuwangwa bwabwe era ne Mukama abuwa ekitiibwa”
Awadde eky’okulabirako eky’abantu abakowooza nti embugo za sitaani nagamba nti sikituufu, abazikozesa ebitali bituufu brbakyamu.
“Engoye zaffe zino zetwambadde oba ziyite egganduula, olwaleero enkoba zetwambadde twazikoze mu mbugo zaffe. Naffe ng’Eklesia ye ssaawa tulage nti ebintu byaffe eby’obuwangwa tulina okubiweesa ekitiibwa” – bishop Silvester Kisitu
Agambye nti Embugo zaffe tezirina kukolwamu bya mikono byokka, oba mu mikolo gya Buganda gyokka, tusobola okuzikozesa mu buli kimu kyetukozesa mu bulamu obwa bulijjo”.
Ebimu ku bikwata ku Lubugo
Olubugo lwe lugoye olusobolwa okwambalwa buli muntu ekiseera kyonna nga bw’abeera ayagadde.
Olubugo luva ku muti Omutuba, era Okukumaga embugo kuwadde abantu bangi emirimu mwebafuna ensimbi nebekulaakulanya.
Abantu abasiinga obungi, basiinga kulumanyira kukuba nti luziikibwamu bafu, era nga teruyitamu mazzi.
Obugumu bw’olubugo era nga luwangaala myaka na myaka, okuba nga teruyitamu mazzi, wadde empewo kwekwava okuluziikamu abafu.
Wano waliwo n’olugero olugamba nti
“Atamanyi mpewo y’emagombe yamma omufu olubugo”
N’abantu abali ku mawanga nabo bongedde okwettanira enkola eno, nga negyebuvuddeko mu kibuga Manchester ekya Bungereza, omumyuka asooka owa Katikkiro wa Buganda Owek. Prof. Twaha Kaawaase Kigongo yatongoza enkola y’okuziika bannauganda abafiiridde ku mawanga mu mbugo.
Enteekateeka eno yakulemberwamu aba Greater Manchester Funeral Services Ltd.
Abaganda n’abakonzo batwala olubugo okubeera olugoye olw’obuwangwa.
Bannabitone abeegattira mu kibiina ki ‘Sanyuka Films Uganda’ mu 2025 baatongoza olutambi lwa firimu lwebaatuuma ‘Kimote’ olulambulula byonna ebikwata ku Lubugo.
Abantu bangi bettanidde okwongera omutindo ku lubugo nga bakolamu ebintu eby’omuwendo n’ebyambalo, omuli
Enkoofiira
Engatto
Engoye
Ekkooti
Ensawo
Bbulangiti
Emisono gya bannalulungi N’ebirala.
Ebyafaayo ku Lubugo
Abawandiisi bebyafaayo.abamu bagamba nti Omutaka w’essiga lya Ssenkungu mu kika kye Ngonge Wamala Buyungo Kaboggoza yeyasooka okuzuula nti Olubugo lusobolera ddala okukolebwamu ekyambalo,ku mulembe gwa Ssekabaka Kimera eyakulembera Obuganda wakati wa 1275 okutuuka1330.
Wabula ate waliwo nabagamba nti lwavumbulwa Ssekabaka Ssuuna bweyali tanafuuka Kabaka, nga yaluηamizibwa mwoyo nazuula nti omulimu gw’okukomaga n’okuggyako olubugo olw’okwambala.
Omuti omutuba okwava olubugo olwasooka gugambibwa okuba nga gwali mu kibira Kyoga mu ssaza Mawokota.
Olubugo lwafuuka ekyambalo ky’abaganda eky’obuwangwa era nekyettanirwa nnyo abantu bonna, okutuusa abazungu n’abawalabu lwebaaleeta engoye ezikolebwa mu Ppamba ne silk akolebwa obusaanyi.
Okusinziira ku minister w’ebyobuwangwa n’ennono,embiri n’okutumbula Oluganda Owek.Anthony Wamala Olubugo lwongedde okwettanirwa ensangi zino, olwa technology ow’omulembe ayambye okulwongerako omutindo okukolamu ebintu ebyettanirwa abavubuka.
