Mu Program Entanda ya Buganda ku 88.8 Radio y’Obujajja, ku mutendera ogw’okubiri nga 4 November, 2024, abamegganyi; Kizito John Lukoma yafunye obugoba 38, ne Musajjaalumbwa Joseph eyafunye obugoba 17 baasuumusiddwa okweyongerayo ku mutendera oguddako ate Ssennyange Emmanuel eyafunye obugoba 14 yawanduse.
Biibino ebibuuzo by’Entanda;
1. Obulombolombo bubiri ku kusimbuliza omufu. Omukolo gukolwa kiro, Omujjwa y’asooka okutema enkumbi esooka.
2. Ensinza y’Abaganda ey’ennono ekuuma etya obutonde bw’ensi? …..Ebifo ebisinzizibwako ng’ekibira obutatemwamu miti.
3. Enjawulo wakati w’okumwenya n’okumwenyereketa…… Okumwenya y’entandikwa y’enseko, Ate okumwenyereketa kwekusukka ku kumwenya.
4. Olugero: Nnannyini kitiko……. Talya bwa mpompogoma.
5. Ani yawandiika ekitabo Ekinywa ky’amaggwa?… Omw Ulisiisi Kibuuka Cuka.
6. Ensi zibeera ne Code number, Code ya Uganda eri ki? ………+256
7. Olusozi Mmengo bwerwali terunnaba kufuna linnya eryo lwayitibwanga lutya? ……Nkaawo.
8. Amakulu g’ebuziba ag’ekisoko. Ekintu okukudda ng’enda y’embuzi bwedda omuli……. Ekintu kyonna kyokolera ddala n’okimalirayo ddala.
9. Embeera bbiri eziyinza okusazaawo okusimbuliza omufu……… Ssinga omuntu oyo aba teyaziikwa weyalina okuziikibwa oba ssinga wabaawo abamukaayanira.
10. Ebika by’Abaganda bikuuma bitya obutonde bw’ensi? ……Emiziro gyaffe naddala ebimera bikuumwa butiribiri n’ebisolo by’okuttale kituleetera okukuuma ebibira.
11. Okuyinama n’okwanaamirira ……..“okuyinama kuduula okwanaamirira kuleka kintu nga tokibisseeko.
12. Olugero: Nnamunye tamala kubala nnyumba………Buli ezimbwa ng’agirinnyako.
13. Amannya g’omuwandiisi g’ekitabo Ebitontome by’Oluganda n’ensomesa yaabyo………MB Mulumba.
14. Pin code ya Airtel erina ebifo bimeka? …..4
15. Kika ki ekya Buganda ekirina omulimu omutongole nga kigukolera awo awasangibwa olubiri lw’e Mmengo?……. Nvubu
16. Amakulu g’ekisoko “Okuba nga zigobye ntulege”…… Okuteganira obusa.
17. Emizizo ebiri mu kusimbuliza omufu….. Tewaabaawoo kukaaba, omuntu eyamuziikako taziika gwakubiri.
18. Engeri enkulaakulana y’ensi bwefuukidde obutonde bwensi omuziziko. ……..Mu kukola enguudo ebifo ebyebyafaayo bingi bisaanyizibwawo ng’emiti gy’ebika.
19. Okusamaala n’okusamaalirira……… Okusamaala kwekutunuulira ekintu n’okimalirako obudde n’amagezi ate okusamaalirira kwekulaba ekintu ekyewuunyisa ennyo.
20. Olugero: Nnumba kigumba kyange……. Bwebukoddo.
21. Ani yawandiika ekitabo Obusenze ku mutala BULAMU? …….Ssemakula Ssemoogere Godfrey.
22. Ensangi zino SIM card kigandawaziddwa, lambulula SIM ….. Subscriber Identification Module.
23. Ennono y’erinnya Mmengo…….. Kwalingako emmengo z’abenvubu.
24. Amakulu g’ekisoko Okusimba eggumba…… Kitegeeza okutambuza ebigere olugendo oluwanvu.
25. Erinnya eddala eriweebwa langi eya kiragala……… Kkulumbisi.
26. Olugero: Kirevu ntende… Ekyalekerera wante n’ekikwata wambuzi.
27. Kabaka Cchwa Nabakka yazaalira Obuganda omulangira omu yekka, yaani? ……Kalemeera.
28. Ekinyomo ekizimba mu lumuli kiweebwa linnya ki? …….Kirembwe.
29. Kkoyi kkoyi nnina mukazi wange alina oluguudo oluva wansi ppaka waggulu…….., Ekibbo n’omugo gwakyo.
30. Abaganda bawanuuza nti omusota bwegukulu gumerako ekitonde kino, kiriwa? Kimerako ekisagazi.
31. Ekikolwa ky’abayizzi abamu okugabirako bannaabwe abafunye ennyama entonotono kiweebwa linnya ki?……… Okuwanira.
32. Ensimbi eyennono etaliimu kituli eweebwa mannya ki? Ensiru oba enfugwa.
33. Mu kwalula abaana abantu bakozesa ebintu ebyenjawulo, ssinga ekyoto kyogenda kufumbako emmere okukimisa essubi erivudde ku kisu ky’endegeya, abaana abo baba banaaba batya?…… Baba bajja kulejja.
34. Omuntu omuwanvu nga mutono nnyo bamugeraageranya ku ki? ……Lusolobyo.
35. Katikkiro wa Buganda eyasaba Bungereza ewe Buganda amazzi posta n’amasannyalaze….. Michael Kawalya Kaggwa.
36. Ekikolwa ekyokujja ebigogo ku bitooke bikozesebwe okulembeka amazzi…… Kugogombola.
37. Olugero: Sserwali lundi ……Omusibe tayita jjimbo.
38. Omuntu alima ennyo bamulabira ku nkuuli, bakiraba batya? …….Enkuuli ziba zizzeeko amabavu.
39. Olugero: Ssenkole mpoomye……… Nalunga yagoya amayuuni.
40. Ebitonde okuva amaliba agaleega engalabi…… Enswaswa n’ettimba.
41. Ekisoko okukwata ekire kitegeeza ki?….. Omuntu amaze ebbanga nga tanaaba.
42. Waliwo ekika ky’emmere ekifaana ey’omuttaka yadde tekulira mu ttaka …….. Kkobe
43. Kkoyi kkoyi Oluguudo olutuuka ku kibuga luvaawa?……. Mu kyalo.
44. Ssinga nnyini kitimba bamusoka okufumita ensolo eba yakiyingidemu, ekikolwa ekyo kiyitibwa kitya?……. Kuweekula.
45. Emmese ezisangibwa mu lumonde ziweebwa linnya ki? ……..Amafukuuzi.
Bitegekeddwa: Kamulegeya Achileo K
