Abadigize bawagidde mu bungi abayimbi era bannamawulire ba CBS radio, Ssendegeya Muhammad amayiddwa nga Omugagga Ssende ne munnabuddu Sharif Lukenge, mu kivvulu kyabwe kyebaatuumye “Obulungibwo Nabutegeera”.
Kibadde ku Tavern Woods e Kabuusu mu Kampala.
Kyetabiddwako minister wa Buganda Ow’ebyobuwangwa, embiri, eby’obulambuzi n’ebyokwerinda Owek.Anthony Wamala, akiikiridde Katikkiro wa Buganda Charles Peter Mayiga.
Abakubirizza okumanya engeri entuufu ey’okukozesaamu ebitone byabwe, naddala bwebagufuula omulimu n’okugufunamu, nti basaanye babeere bayiiya era abalemerako.
Omugagga Ssende ne munnabuddu Sharif Lukenge balaze abawagizi babwe nti ddala bongedde okuggumira mu by’okuyimba bwebalinnye ku stage omulundi ogusooka ku ssaawa 4 ez’ekiro nebayimba ennyimba zabwe 4 awatali kusirikamu, omuli Abakyala,
Totuukiridde naawe, Byateredde ne Ndya Zange.
Abayimbi abalala ababawerekeddeko nabo basanyusizza abadigize, okubadde Sir Mathias Walukagga, Naaganaaga, Sewa Sewa n’abalala.
Wabula wakati ng’ekivvulu kigenda mu maaso, Nnamutikkwa w’enkuba afudembye.
Enkuba wetonyedde, ng’abawagizi balindiridde oluyimba olubadde olw’ensonga “Obulungi bwo Nabutegeera”, olwo bulyomu nafuna weyeggama nga bwasobola n’okulengera obulungi stage, ng’endongo bwesindogoma.
Ku ssaawa mukaaga ez’ekiro Omugagga Ssende ne munnabuddu Sharif Lukenge bakomyewo ku stage nebaddamu buto okukuba endongo, ng’eno enkuba bwefudemba.
Oluyimba Obulungibwo nabutegeera oluwedde bweruti, awo abawagizi babwe nebatandika buli omu okunoonya eryamuleese, wakati mu kire ky’enkuba ebadde etonnya obutasalako.#
