Ekyuma kya government ekikebera endagaluse kikakasizzaako abaana 4 bokka ku baana 25 abaakebereddwa, okuzuula abaana b’omuyimbi omugenzi Paul Job Kafeero.
Ebifulumziddwa nga byayisiddwa mu magezi ga science, biranze nti abaana 4 okuli Benedicto Kafeero, Simon Peter Kafeero, Thomas Swaz Kafeero ne Elizabeth Nagawa Kafeero nti bebokka abaana Kafeero beyaleka ku nsi.
Bifulumiziddwa abakugu mu kwekebeggya endagaluse (DNA) ku mukolo ogubadde ku kitebe kya police e Naguru.
Gwetabiddwako abaana bonna 25 abaakebereddwa, ba Nnyabwe n’aboluganda lwa Kafeero.
Embeera okutuuka wano yava ku baana okufuna obutakkaanya nga bakaayanira emmaali y’omugenzi, naabamu okwagala okumanya ekituufu kubanga babadde batandise okuzaala baana bannabwe naye nga tebamanyi kituufu ku buzaale bwabwe.
Abaana abamu baasalawo okuddukira eri eyali minister w’abaana Balam Barugahare Ateenyi, nga bagala kuyambibwa bakeberebwe bazuule ekituufu n’okumalawo endooliito.
Mu ngeri yeemu waliwo abaddukira mu kooti nga bagala nabo bayambibwe, era kooti neeragira ebisigalira bya Kafeero biziikulweyo aggibweko endagabutonde zikeberebwe wamu n’abaana bonna.
ACP Andrew Mubiru akulira okukebeera DNA mu police, agamba nti bagoberedde amateeka gonna nga bakola enteekateeka eno.
Minister Baram asinzidde ku police e Naguru naagumya abaana 21 ababadde beyita aba Kafeero abatayisemu, nti government weeri egyakubalabirira.#
