Ttiimu y’essaza Mawokota eraze amaanyi mu mpaka z’Amasaza ga Buganda 2026, bwekubye Gomba goolo 1-0 mu mupiira ogubaddeko n’okuluma obugigi mu kisaawe e Buwama.
Goolo ewadde Mawokota obuwanguzi eteebeddwa Madasiru Ijosiga mu kitundu eky’okubiri mu dakiika eye 75.
Omutendesi wa Gomba Felix Ssekabuuza tamazeeko mupiira guno, agobeddwa ku kisaawe lwa kusiwuuka mpisa.
Omupiira nga gunaatera okuggwa, wabaluseewo okusika omugwa ku katebe ka Gomba, nga balumiriza nti Mawokota ebadde nabazannyi 12 ku kisaawe, kyokka oluvanyuma embeera ezze munteeko omupiira ne gugenda mu maaso.
Omupiira omulala mu kibinja kye kimu Masengere, Kyaggwe ekubye Bulemeezi goolo 2-1 mu kisaawe kya Bishops SS e Mukono.
Buddu erumbye Buweekula omwayo mu kisaawe e Mubende ne bagikubirayo goolo 1-0, eteebeddwa Obed Ronald mu kitundu eky’okubiri.
Busujju ekubye Kyadondo goolo 1-0 e Kakindu nga ebadde ya peneti.
Mawogola nayo ewangudde omupiira ogusooka bwekubye Kkooki goolo 1-0 mu kisaawe e Ssembabule.
Bugerere nayo efunye obuwanguzi obusoose bwerumbye Kabula omwayo mu kisaawe e Bakijjulula Lyantonde n’egikubirayo goolo 2-0.
Busujju ne Kyaggwe be bokka abaakawangula emipiira gyabwe gonna 3 gye bakazannya mu kibinja.
Bisakiddwa: Isah Kimbugwe
