Police ya Uganda eragidde abadduumizi ba police okwetoloola eggwanga lyonna okukwata n’okuvunaana bannabyabufuzi bonna abatambula n’oluseregende lw’abantu nga bagenda okukuba kakuyege mu bitundu ebyenjawulo nti bakikolera wabweru w’amateeka agalambikibwa akakiiko k’ebyokulonda.
Police egambye nti amateeka g’akakiiko k’ebyokulonda agaweebwa abesimbyewo bonna gamanyiddwa bulungi, era tegakkiriza muntu yenna kukuba lukuηaana mu luguudo, oba okutambula n’omuyeye gw’abantu nti kubanga kibeera kitattagana emirimu gyabalala.
Mu mbeera eno police ezzeemu okuwa abadduumizi ba police ebiragiro obutakkiriza munnabyabufuzi yenna kuva ku biragiro byabaweebwa, era ebalagidde okutandika okukwata abava ku mateeka gano.
Omwogezi wa police mu ggwanga Rusoke Kituuma agambye nti enkola y’okutambula n’abantu abangi yevaako n’okulwanagana kw’abawagizi babanabyabufuzi bano, kyagamba nti tebagenda kukkiriza embeera eno kugenda maaso.
Kituuma abadde mu lukuηaana lwa bannamwulire ku kitebe kya police e Naguru, nagamba nti waliwo bannabyabufuzi abalabiddwako nga batambula n’abantu abayitirivu ku makubo, nabamu okukuba enkuηaana mu luguudo kyebamanyidde ddala nti kimenya amateeka.
Mu ngeri yeemu Kituuma agambye nti bamaze okulagira abasirikale babwe okukwata abantu bonna abenyigira mukuyuza ebipande bya bannabyabufuzi bavunaanibwe.
Police era erabudde bannabyabufuzi abakozesa ambulances okubaggulira ekkubo nga baliko eηendo zebagendamu, nti bwebatakikomya boolekedde okuvunaanibwa.
Kituuma agambye nti ambulance ezikkirizibwa ku luseregende lwémmotoka za bannabyabufuzi zirina okuba nga zezisemba emabega sso ssi kubaggulira kkubo, nga singa wabeerawo omu ku bannabwe afunye obuzibu olwo ambulance neryoka emuddusa mu ddwaliro.#
