Ssaabasajja Kabaka Empologoma ya Buganda Ronald Muwenda Mutebi II mu butongole egguddewo ekkadiyizo lya eklezia Katulika, eribbuddwamu “Kabaka Muteesa the First, Catholic Memorial Museum”.
Omukolo ogwókuggulawo Ekkaddiyizo gwe gukulembeddemu ebikujjuko ebyókukuza emyaka 100 egya Eklezia Lutikko eyé Lubaga, ebiriwo nga 26 October,2025.
Mu bubaka Maasomoogi bwátisse omumyuka owókubiri owa Katikkiro era Omuwanika wa Buganda Owek Rotarian Robert Wagwa Nsibirwa, asiimye nnyo Eklezia olwókuteekawo ekkaddiyizo.
Omutanda agambye nti lijja kuyamba nnyo abómulembe guno némirembe egirijja, okumanya nti ebyóbuwangwa bitambulira wamu néddiini.
Owek Robert Wagwa Nsibirwa ku lulwe yeebazizza nnyo Eklezia olwénkulaakulana gyétaddewo eyékkaddiyizo.
Ssaabasumba wéssaza ekkulu erya Kampala Kitaffe Paul Ssemwogerere azzeemu okusiima Obwakabaka bwa Buganda obwawaayo ettaka okwazimbibwa lutikko yé Lubaga, bwatyo neyeeyanza nnyo Muzzaηηoma Ronald Muwenda Mutebi II olwókukuuma enkolagana eyo ne Eklezia, eyabangibwawo ba jjajjaabe.
Mu ngeri yeemu Ssaabasumba yeebazizza government eya wakati naddala ministry yébyobulambuzi ebakwatiddeko mu kutuukiriza eddimu eryo,awamu n’ebitongole ebirala.
Ekkaddiyizo lino lyazimbibwa kumpi ne Lutikko yé Lubaga ngékizimbe kimazeewo obuwumbi bwa shs 4.
Ekkadiyizo lino lirimu ebyafaayo bya Eklezia nga byoleka okuva Kabaka Muteesa asooka lwe yawandiikira Bungereza abaali abafuzi bámatwale, ngáyita abasomi bajje kuno basomese abantu be.
Mulimu ebyafaayo byóbwakabaka bwa Buganda omuli néddiini yÁbaganda eyénnono.
Mulimu ebifaananyi ebyoleka Buganda eyébiseera ebyo ngéddiini yaakajja, bannaddiini abaasooka nébirala bingi.
Ekkaddiyizo lino lyatandikibwa okuzimbibwa mu 2014, nga mu biseera ebyo eyali Ssaabasumba omugenzi Dr Cyprian Kizito lwanga yéyawoma omutwe mu kirowoozo ekyo.
Kalidinaali Fernando Filoni okuva e Roma, yéyatongoza omulimu gwókuzimba ekkaddiyizo eryo mu 2017.
Ku lutikko e Lubaga akayisanyo ka maanyi wakati mu kwetegekera ebikujjuko byémyaka 100 egya lutikko eno, era omukulembeze wéggwanga Yoweri Kaguta Museveni yásuubirwa okubeera omugenyi omukulu.
Bisakiddwa: Kawuma Masembe
