Kyadaaki olukiiko lw’abakadde abeebuzibwako ensonga mu kibiina ki FDC lukkaanyisizza ababadde balwanira okukwatira ekibiina kya FDC bendera kubwa president bwa Uganda, nebasalawo eweebwe Nathan Nandala Mafaabi.
Embiranye y’okweyagaliza bendera ebadde wakati wa president wa FDC Eng Patrick Amuriat Oboi, ne Ssaabawandiisi w’ekibiina Nathan Nandala Mafaabi.
Eng Patrick Amuriat Oboi yeyakwatira FDC bendera naavuganya ku bwa president mu kalulu ka 202, era yafuna obululu emitwalo asatu mwesatu mu kasanvu (337,000).
Ku mulundi guni abakadde abeebuzibwako ensonga mu FDC basabye Amuriat addeko ebbali alekere Nandala.
Mu lukuηaana lwa bannamawulire olutudde ku kitebe ky’ekibiina e Najjanankumbi, Patrick Amuriat alangiridde nti mwetegefu okuwagira Nandala Mafaabi ku bwa president era nti akisazeewo awatali kukakikbwa okudda emabbali.
Amuriat asuubizza Nandala nti nga naye bwazze amubeererawo mu nsonga nnyingi ez’ebyobufuzi n’ezitali, naye siwakumuvaamu.
FDC ezze esaanga okusoomozebwa okwenjawulo mu by’obukulembeze bwayo, omuli nebigambibwa nti NRM yeyassa ensimbi mu Eng.Patrick Amuriat avuganye ku bwa president mu kalulu ka 2021, nekigendererwa eky’okukendeeza ku bululu bwa Robert Kyagulanyi owa NUP eyali asiinga amaanyi ku ludda oluvuganya government.
Okuva mu kalulu ka 2016 ebibiina 2 eby’amaanyi byebyakamerukawo, nga bitandikibwawo ba memba abaamaanyi okuva mu FDC, omuli ekya ANT ne PFF.
Mu kiseera kino FDC egamba nti essira egenda kukulissa ku nsonga y’okulaba nga bannauganda bakulaakulana nga babeera n’ensimbi mu nsawo, era gwemulamwa kwebagenda okutambuliza kakuyege wabwe mu kalulu k’eggwanga aka 2026.#
