Ssabasumba we Ssaza ekkulu erye Kampala, Paul Ssemogerere, atongozza okusonda ensimbi ezebijaguzo eby’emyaka 100 egya Lutikko e Lubaga, nasiima bana Kampala olw’okwagala ekerezia.
Ssabasumba ng’omugenyi owenjawulo ku mukolo ogubadde ku Pope Paul Memorial Hotel mu Ndeeba, awaddeyo obukadde bwa shs 50.
Agambye nti omulimu ogwakwasibwa akaiiiko munene nnyo, naye yewunyizza nti mu wiiki 2 basobodde okusonda obukadde bwa shs obuli mu 700, ku buwumbi 2 n’ekitunde ezetaagibwa.
Atongozza akatabo ak’ebyafaayo bya lutikko ye Lubaga L, neyebaza Ssabasumba eyawummula Omutiibwa Emmanuel Cardinal Wamala, olwebyo byeyakolera essaza ate naye okumugunjula.
Omukolo gw’etabyeko omumyuka owookubiri owa Katikkiro era omuwanika wa Buganda Owek. Robert Waggwa Nsibirwa, Sipiika w’Olukiiko lwa Buganda Owek. Patrick Luwaga Mugumbule n’abalala okuva mu Bwakabaka nebawaayo ettu ku lwabwe.
Ssabasumba ayanjulidde olukiiko obukadde bwa shillings 300 obwawereddwayo President Museveni ku mulimu guno.
Ssentebe w’olukiiko olw’enteekateeka zonna, Eng. Pius Mugalaasi, awamu ne ssentebe w’olukiiko olusonda ensimbi zino John Fred Kiyimba Freeman bebazizza nnyo abantu bebatuukiridde mu nnaku entono ate nabo nebajjumbira.
Centenary bank ewadde obukadde 50, abasirikale ba Paapa omwami n’omukyala Yiga bawaddeyo obukade 40, essomero lya Lubaga Girls obukadde 15, Lubaga Land office 0bukadde 10, Lubaga Hospital 5, Joseph Kiwanuka –SWICO 4, n’abalala bangi basoonze omuli n’abasosolodooti.
Ku buwumbi 2 n’ekitundu ezeetagisa okujaguza emyaka 100 egya Lutikko ye Lubaga, kuliko n’okuzimba ekizimbe okunabeera police, parking ne Restaurant, n’ebintu biralala bingi.
Kyo ekizimbe okuli ofiisi zaba father kiwedde.
Omukolo gw’okujaguza emyaka 100 egya Lutikko y’e Lubaga gwakubaawo nga 26 October w’omwaka guno nga basuubira nti byonna byebategese okuzimba n’okuddaabiriza biriba biwedde.
Mu buufu bwebumu aba kampuni entabuzi ya langi eya Plascon Uganda bawaddeyo langi yonna egenda okukozesebwa okuyooyoota lutikko yonna olunaku lutuuke ng’etemagana.
Bisakiddwa: Kamulegeya Achileo K ne Kawuma Masembe
