Munnamateeka Erias Luyimbazi Nalukoola akubye ebirayiro ebimufuula omubaka omujjuvu owa Kawempe North.
Abikubidde mu kifo sipiika wa parliament waakyaliza abagenyi ku parliament.
Ebirayiro abikubye ku ssaawa 6 ezomuttuntu, era ng’awerekeddwako ab’oluganda lwe, saako akulira oludda oluvuganya mu parliament Joel Ssenyonyi, ababaka ba NUP ne bannabyabufuzi abalala.
Kalaani wa parliament Adolf Mwesigye asoose kumusomera amateeka agalambika parliament, era namutegeeza nti tekimenya mateeka olw’okuba ng’alayiziddwa mu offiisi ya sipiika.
Oluvannyuma lw’okukuba ebirayiro, sipiika Annita Annet Among ayanirizza Nalukoola mu parliament eye 11.
Aweeredde ebintu byonna ebimufuula omubaka omujjuvu, era naakwasibwa n’ensimbi eziri mu bukadde 200 ezokugula emmotoka empya.
Omubaka Erias Luyimbaazi Nalukoola asuubiza okuggyayo nagomubuto okutuusa mu parliament ensonga eziruma banna Kawempe North.
Asabye sipiika okumuwa omukisa okwanjula ensonga za parliament ezimaze ebbanga nga tezaanjulwa.
Nalukoola yalondeddwa mu kalulu akaabaddemu okuluma obujiji akaakubiddwa nga 13 March,2025, okumala ekisanja eky’emyaka 5 (2021 -2026), ekyalimu Muhammad Sseggiriinya eyafa mu January,2025.#
