Police ye Entebbe ezudde amabaati 215 agateeberezebwa okuba aga wofiisi ya Ssaabaminister agaalina okuwebwa abantu abanaku e Kalamoja.
Amabaati gazuuliddwa mu kikomera ky’omutuuze omu ku kyalo Nkumba Bufulu mu Kavuma zone ,mu Town Council eye Katabi mu bitundu ebye Ntebe.
Police ye Entebbe egamba nti baafunye amawulire g’amabaati gano okuva mu ba mbega babwe, nabo kwekukola ekisoboka okulondoola amawulire gano.
Omuduumizi waayo SSP Muheirwe Keneth agambye nti baagumbye mu kifo kino okuva ekiro,era mu kikomera kino baasanze waliwo emmotoka kika kya TOYOTA ISUZU Foward No. UAZ 306A kwegabadde gatikkibwa.
Abatuuze abazze okwelolera ku mbeera eno bewunyizza amabaati ga Wofiisi ya Sabaminsita bwe gatuuka ku kyalo kyabwe.
Police etandise okunoonya nanyini kikomera kino omusaangiddwa amabaati,n’abakozi ababadde bazimba ennyumba mwegasangiddwa, babeeko byebannyonyola ku bikwata ku mabaati gano.
Nannyini mmotoka ebadde etikkibwako amabaati Geoffrey Kuteesa myaka 34 akwatiddwa n’atwalibwa ku police n’emmotoka ye.
Kuteesa agenze yemulugunya olw’okukwatibwa police n’assibwako empingu, nti so nga naye emmotoka abadde yagiwa ddereeva eyapangisiddwa okutambuza amabaati.
Police era eriko emikebe gya langi gyetutte, ng’egamba nti langi eno ebadde esiigibwa ku mabaati gano 215, okubuzaabuuza obujulizi.
Bisakiddwa: Kakooza GeorgeWilliam
