Parliament yomukago gw’amawanga g’obuvanjuba bwa Africa eya East African Legislative Assembly (EALA) ewandiikidde sipiika wa parliament ya Uganda, n’erangirira nti ebifo by’ababaka ba Uganda 2 nti byasigadde bikalu era byetaaga okulonderwamu abalala.
Sipiika wa EALA nga munnansi wa Burundi Joseph Ntakirutimana ebifo byababaka ba Uganda byalangiridde nti bikalu kuliko ekya James Kakooza ne Denis Namara, olw’ababaka bano okwesimbawo mu kalulu ka Uganda era nebalondebwa mu parliament ya Uganda eddako.
James Kakooza yaalondebwa ng’omubaka akiikirira abakadde ba Buganda mu parliament eddako eye 12, so nga Denis Namara yaalondebwa ng’omubaka wa Buyaga West mu parliament era eddako.
Bombi bali ku babaka omwenda Uganda beyaasindiika mu parliament ya East African Legislative Assembly.
Oluvanyuma lw’okulonndebwa , sipiika wa parliament eno eya East African legislative assembly Joseph Ntakirutimana yawandiikidde sipiika wa Uganda.m namutegeeza nti ebifo ebyo byetaaga okujjuza.
Ebbaluwo eno ereeseewo akatuubagiro n’okukubagana empawa mu bagoberezi b’ensonga zomukago gwa East Africa awamu nababaka bennyini aboogerwako
Omubaka James Kakooza abuulidde CBS radio nti sipiika wa parliament y’omukago teyeebuzizza ku bannamateeka b’omukago ng’awandiika ebbaluwo eno nti kubanga yabadde teyetaagisa mu kiseera kino.
James Kakooza agambye nti nga tanalayira ng’omubaka wa parliament ya Uganda omujjuvu, sipiika wa parliament yomukago talina ngeri yonna gyasobola kulangirira kifo kye mu parliament ya EALA nti kikalu.
Kakooza agambye sipiika wa parliament y’omukago yandiba ng’alina ebiruubiribwa ebikusike.
Awadde eky’okulabirako nti Tanzania ababaka baayo mu parliament yoomukago baagenda nebeesimbawo ewaabwe era nebalondebwa mu parliament e Tanzania naye bbo tabawandiikiranga.
Munnamateeka Fred Mukasa Mbidde eyaliko omubaka mu parliament yomukago, awabudde sipiika womukago, ebbaluwo eyo egisazeemu nti kubanga yagiwandiise mu nsobi.
Mbidde awabudde ne parliament ya Uganda okwetegereza ensonga eno n’obwegendereza, nti kubanga ababaka ababiri aboogerwako James Kakooza ne Denis Namara bakyali babaka ba EALA okutuusa nga balayiziddwa mu parliament ya Uganda ng’ababaka abajjuvu, mu May 2026 gy’emyezi ebiri okuva kati.
Ennyingo eya 50 ey’etteeka eryasaawo era okutambulizibwa omukago likugira ababaka ba parliament okuva mu mawanga g’omukago, okuvuganya ate ku bifo byobukiise mu parliament yomukago.
Okulonda okwawamu okwa parliament yomukago gwa East Africa kwakubaawo omwaka ogujja 2027.#
