Ekitongole ky’ebyebigezo mu ggwanga ki Uganda National Examinations Board kifulumizza ebibuuzo by’abayizi abaatuula eby’akamalirizo ebya S.4 omwaka oguwedde 2022.
Ku bayizi abaatuula ebibuuzo 345,695, mu centers 3703, abaayise era bakkirizibwa okweyongerayo ku mutendera oguddako bali 329,939, ate abayizi 15,756 bagudde.
Ssentebe wa UNEB Dan Odongo, agambye nti waliwo abayizi 3,764 abeewandiisa okukola ebibuuzo bino wabula tebaalabikako ku nnaku z’ebigezo.
Mu ngeri yeemu Odongo agambye nti ebibuuzo by’abayizi 1,035 bakyabikutte,nga bateeberezebwa okwenyigira mu kubbirira ebigezo.
Abayizi 46,667 bayitidde mu ddaala erisooka, 76,745 mu ly’okubiri, 88,690 mu ly’okusatu, 11,783 mu ly’okuna ate 15,756 baagudde n’enkoona n’enywa.
Ekkomera ekkulu e Luzira lyatuuza abayizi 51, abayizi 8 nebayitira mu ddaala ery’okubiri, 16 mu ly’okusatu, 8 mu ly’okuna ate omu agudde.
Abayizi abaliko obulemu abaatuula omwaka oguwedde baali 721, era bayitidde mu ddaala lyakuna.
Minister w’ebyenjigiriza Janet Museveni agambye nti bakunyiikira okusomesa ennimi engwira naddala oluchina olwómuwendo gwa bannauganda abettanira okusuubula mu China okweyongera.
Mu ngeri yeemu asuubizza nti government ekola kyonna ekisoboka okutunula mu nsasula y’abasomesa ba Arts omusaala ogwegasa nga bannaabwe abasomesa Sciences.
Agambye nti gavumenti nneetegefu okulwanyisa emize gy’okubbirira ebibuuzo nga bassa mu nkola etteeka eppya erikangavvula ababwenyigiramu.
Abayizi abatalina ddaala mwebayitidde Janet Museveni abawadde amagezi okuddamu okwetegereza oba okufuna engeri gyebasomamu emisomo gy’emikono.
Okusunsulamu abayizi abanaayingira S.5 kwakubaawo nga 23 ne 24 February mu kibangirizi kyabannamakolero e Lugogo, olwo batandike okusoma mu S.5 nga 6 March 2023.
Okutwalira awamu, ku mulundi guno abayizi bakoze bulungiko okusinga emyaka egiyise, newankubadde waaliwo okusoomoozebwa kw’ekirwadde kya Ebola ekyataataaganyaamu entambuza n’enkola y’ebigezo.
Abayizi baakoze bulungi nnyo amasomo okuli Olungereza, Eddiini naddala Ey’obusiraamu, Agriculture, Geography n’okusiiga ebifaananyi.
Bisakiddwa: Kamulegeya Achileo K