Super supreme mufti wa Uganda shiek Shabaan Galabuzi asiimye abakulembeze ku ludda lw’ebyobufuzi mu district ye Wakiso okussaawo enkola ey’okutambulira awamu n’abantu abalala ku buweereza obwenjawulo.
Sheik Shabaan Galabuzi asinziridde mu maka g’omubaka omukyala owa district ye Wakiso Betty Ethel Naluyima e Kiwologoma mu municipaali ye Kira district ye Wakiso.
Mufti akaatirizza nti singa abakulembeze bawuliziganya bulungi n’abantu bebakulembera kijja kuyamba eggwanga okusituka mubyenfuna .
Sheik Galabuzi era asabye abayisiraamu okuva mukwekubagiza wabula bongera amanyi mukukuuma emaali y’obusiraamu .
Omubaka omukyala owa district ye Wakiso Betty Ethel Naluyima asinziridde wano nasaba government eri mu buyinza okukozesa ekiseera kino ng’enkungaana ezamawanga ga Nampawengwa ogwa NAM ne G77+China ziyindira mu Uganda okwekuba mu kifuba bayimbule abantu abaabuzibwawo, abalala bali mu makomera.
Abamu kubakulembeze mutwale lye Bweyogerere nga bakulembeddwamu Hajji Ahmed Bbaale Junior basiimye supreme muft olwokulambula abasiraamu, era bano bawadde nebanaabwe amagezi okwenyigira mu bulimi n’obulunzi basobole okuyimirizaawo amaka gaabwe wamu n’emirimu gy’obusiraamu.
Sheik Shabaan Galabuzi okuva alambudde etwale lye Kira okumala ennaku 2, obugenyi bwe abufundikide ku Masigdi Ahmed e Kiwologoma.
Yalambuddeko ne kubiggwa by’abajjulirizi abakatoliki naabakulisitaayo e Namugongo okwongera okunyeeza obumu mu nzikiriza .
Bisakiddwa: Tonny Ngabo
