Ttiimu ye Ssaza Ssingo ne Kyaggwe zitaangazizza emikisa egy’okugenda ku fayinolo y’empaka za Masaza ez’omwaka guno 2025, bwe gawangudde emipiira gyabwe egy’oluzannya olusooka ku mutendera gwa semifinal.
Ssingo erumbye Bugerere mu kisaawe e Ntenjeru n’egikubirayo ggoolo 2-1 mu mupiira ogubaddemu enkuba.
Bugerere yesoose okuteeba ggoolo ng’eyita mu Wamala Henry, kyokka Ssingo evuddeko mabega ng’eyita mu Shaban Kayongo ne Ismael Ramitala, ate omuzannyi wa Bugerere Osman Mayanja alemeddwa okuteeba peneti.
Omupiira guno gwetabiddwako minister w’ebyemizannyo abavubuka n’ebitone Owek Ssalongo Robert Sserwanga, Mugerere Samuel Ssemugoma ne Mukwenda Deo Kagimu, mukwenda eyawumula Godfrey Mbalire naabakulembeze ku mitendera egyenjawulo.
Mu kisaawe kya Mubende NTC, Kyaggwe erumbye Buweekula n’egikubirayo goolo 1-0 etebeddwa Godfrey Ssenyonga.
Kati ttiimu zino zigenda kuddiηana ku Sunday ejja nga 19 October,2025 okufunako ttiimu ezigenda ku fayinolo enabaawo nga 01 November,2025 mu kisaawe e Nakivubo.#
Bisakiddwa: Isah Kimbugwe
