Ssaabasajja Kabaka Ronald Muwenda Mutebi II, asiimye Owek. Joseph Balikuddembe Ssenkusu abeere Ssenkulu w’ettendekero lya Buganda ery’ebyemikono erya Buganda Royal Institute of Business and Technical Education e Kakeeka Mengo.
Azze mu bigere bya Owek Dr. Anthony Wamala amaze emyaka 15 nga ye ssenkulu waalyo, wabula nga kati yasiima n’amukwasa okubeera minister bw’eby’obulambuzi,eby’obuwangwa,entambula za Kabaka n’ebyokwerinda.
Owek. Dr. Wamala mu butongole awaddeyo office eri Owek Balikuddembe era n’atuuzibwa minister w’ebyenjigiriza mu Buganda Owek. Cotilda Nakate ku mukolo ogubadde ku ttendekero wennyini e Kakeeka Mengo.
Owek. Balikuddembe Ssenkusu yeeyanzizza Ssaabasajja okumulondobayo n’asiima amuweereze nga ssenkulu, n’asuubiza okukola n’amaanyi okutwala mu maaso Owek Wamala byakutteko.
Owek. Ssenkusu asuubizza okulwana n’amaanyi ge gonna okununula ettaka ly’ettendekero eryewangamizibwako bannakigwanyizi ng’ayita mu mateeka.
Owek. Nakate asabye ssenkulu omuggya, okuyambako okukwasizaako amatendekero ga Ssaabasajja ag’ebyemikono amalala , n’anokolayo Kasawo Technical Institute mu ssaza Kyaggwe nalyo lisituke lituukane n’omutindo.
Amusuubizza obuyambi bwonna bwanaaba yeetaaga okuva mu ministry naddala ku nsonga ezeetaaga eddoboozi n’omukono gwe nga minister.
Owek. Dr. Anthony Wamala, asabye Owek. Ssenkusu okutambulira ku mulamwa gw’obumu mu bayizi abazadde, abasomesa n’abaweereza ku mitendera gyonna lwanasobola okukola omulimu obulungi.
Ssaabasajja Kabaka yasiima n’atandikawo ettendekero ly’ebyemikono okubangula abantu be mu magezi ag’ensibo mu 2008, lyatandika n’abayizi 700 wabula kati woosomera bino nga lirina abayizi abasoba mu 5080.
Omukolo gw’okutuuza ssenkulu omuggya gwetabyeko ba mmemba b’olukiiko olufuzi olw’ettendekero lino nga bakulembeddwamu ssentebe waalwo, Omuk. Dr. Kasozi Mulindwa.
Bisakiddwa: Kamulegeya Achileo Kiwanuka.