Ttiimu ya Uganda ey’omupiira ogw’okubakaa eya She Cranes eyongedde okulaga eryanyi mu mpaka z’ensi yonna eza Celtic eziyindira mu kibuga Glasgow ekya Scotland, ekubye Northern Ireland obugoba 72-46.
Guno gubadde mupiira ogw’okubiri ogw’omuddiriηanwa She Cranes gwewangudde mu mpaka zino, nga yaguddewo empaka zino n’okukuba Namibia obugoba 65-38.
Margret Bagala yalondedwa ng’omuzannyi asinze banne mu mupiira gwa She Cranes me Northern Ireland, ate nga Shadia Nassanga ye yalondebwa nga eyasinze mu mupiira gwa She Cranes ne Namibia.
She Cranes egenda kukomawo mu nsiike okuzannya abategesi aba Scotland.
Oluvanyuma lw’emizannyo 2 She Cranes gye yakazannya mu mpaka zino, kati erina obubonero 04 ne goolo omugatte 127, ate nga bwoggyako zebagiteebye efisaawo 54.
She Cranes eri mu kweyambisa empaka zino okwongera okwetegekera empaka za Africa Netball Championship, ezigenda okubeerawo omwezi ogujja ogwa December e Namibia ate n’empaka eza Spar Series ezinabeera e South Africa omwezi ogujja ogwa December,2025.
Omutendesi wa She Cranes Rashid Mubiru yatutte ttiimu yabazannyi 14 e Scotland.
Bisakiddwa: Isah Kimbugwe
