Ssabaminister wa Uganda Robina Nabbanja alagidde omugagga w`OmuKampala Hamis Kigundu okutekawo emidumo egyamaanyi egiyingiza amazzi mu mwala, okusobola okutanngira ekizibu kya mazzi agabadde ganjaalira mu Kampala buli nkuba lwetonnya.
Ssabaminister alambudde abasuubuzi abaakosebwa wiiki ewedde nga 31 October,2025, enkuba bweyatonnya amataba negaggwera mu maduuka neyonoona emmaali yabwe.
Alaambudde Omwala gwennyini ogwa Nakivubo ogugambibwa okuba nga gwe gwavaako obuzibu, era nga mu kiseera kino okuguzimba kugenda mu maaso.
Ssabaminiater bwamalirizza okulambula nga Ali wamu ne Minister Kampala Hajjat Minsa Kabanda, Minister omubeezi Owa Kampala Kabuye Kyoffatogabye, Ssenkulu wa KCCA Hajjat Sharifah Buzeki nabalala, basisinkanye omugagga Hamis Kiggundu nebamutegeeza nti basaanze ba Engineer bebaaggala emikutu gyonna egiyiwa amazzi ku mwala, era nti alina okugiggula mu bwangu ate n’okusaako emirala emigazi obulungi, gireme kuddamu kuleeta buzibu.
Ssabaminister era ayongedde naatangaaza abasubuuzi Ku kiragiro kya president Museveni, ategeezezza nti president yasuubizza okibakwasizako ku bintu byabwe byebaafirwa sso ssi kubaliyirira.
Omugagga Hamis Kiggundu mu kwogerako nebannamawulire yetondedde abasuubuzi abakoseddwa wamu n`okubasaasira, era nategeeza nti ekiragiro ekimuwereddwa agenda kukiteekesa mu nkola.
Bisakiddwa: Musisi John
