President wa Uganda Gen Yoweri Kaguta Museveni nate azeemu okukikkaatiriza nga bwatagenda kuttira kuliiso ku bantu abalimira omuceere mu ntobazi, nti kino kittatana obutonde era nga kyandikosa n’embeera y’obudde bwa Uganda.
Gen Museveni asinzidde mu kuggulawo ekkolero ly’emmere y’ebyennyanja e Njeru mu district y’eBuikwe eriyitibwa De heus fish feed factory, n’ategeeza nti omuceere gwaletebwa aba China nti naye okugulimira mu bifo by’entobazi kyandiviirako enkyuukakyuka mu mbeera y’obudde bannauganda, naawa amagezi abagulimamu okuzaamuka wakiri balime omuceere ogwokulukalu bakozese amazzi g’entobazi okufukirira.
President Museveni agambye nti bweyali alambula eggwanga nga yekenenya enkola eya Parish Development Model, yazuula nga ekimu byaali bikyasinze okulemesa banna Uganda okwenyigira mu bulunzi bw’ebyenyanja y’e mmera yabyo eyali egula obusanga, era n’ategeeza nti ekkolero lino lyakuyamba okukendeeza ebbeeyi yaabyo.
Awadde amagezi eri abavubuka okukola ebibiina government esobole okubakolera ebidiba balunde olwo benogere ensimbi.
Minister omubeezi ow’ebyobuvubi Helen Adoa agambye nti ekkolero lino lyakuletera omuwendo gw’ebyennyanja Uganda gw’etunda ebweru okweyongera.
Ssenkulu w’ekkolero lino Bon Tjeenk Willink agambye nti balina essuubi nti ekkolero lino lyakulinnyisa omuwendo gw’abalunzi b’ebyennyanja mu Uganda.
Bisakiddwa: Ssebwami Denis
