Olusirika lw’ababaka ba parliament abaakalondebwa bannakibiina ki NRM, n’abatalina bibiina wabula nga bakkiririza mu ndowooza ya NRM olubadde luyindira e Kyankwanzi okumala wiiki nnamba lukkomekerezeddwa.
Yatandika nga 07 April, akomekkerezeddwa 14 April,2026.
Luggaddwawo obukulembeze w’eggwanga era ssentebe w’ekibiina ekyo Yoweri Kaguta Museveni Tibuhaburwa.
Nga ssentebe w’ekibiina alagidde buli mubaka aweebwe obukadde bwa shs 100 buli omu,nga bayingira parliament eye 12, baleme kwewola nsimbi mu bawozi b’ensimbi abagendererwa okubatwalako ebintu bybawe.
Alagidde nti basooke baweebwe obukadde 20, ate e 80 kyakubaweebwa oluvannyuma.
Olumaze okuggalawo olusirika naabalambuza ffaamu ye eye Kawumu mu district ye Nakaseke, gyasinzidde okubalaga byakolerayo nti nabo bafuneyo eky’okuyiga bwebaddayo eri abalonzi baabwe babasomese.
Era eyo president Museveni gy’asinzidde naalabula ababaka bano okwewalira ddala ebikolwa eby’okulya enguzi, nti kubanga kanaabakwatako kakubajjuutuka.
President Museveni agambye nti kyannaku nti obukiiko bwa parliament ate obwandirondodde ababbi ate bufumbekeddemu babbi.
Awadde amagezi eri ababaka abaggya babeere bakalabalaba bakwate ababba ensimbi z’eggwanga, sso ssi bbo kubeera miyungagano gy’abbi.
Era alabudde nti nga bweyakwata ababaka abamu gyebuvuddeko, omubaka yenna aneetantala neyenyigira mu bulyi bw’enguzi wakumukwasa mukono gwakyuma
Ttanamiruka wa NRM eno yetobeseemu ensonga nnyingi, nga wewaafubutuse ekirowoozo eky’okwongeza emyaka gy’ekisanja, okuli eky’omukulembeze w’eggwanga, ababaka ba parliament ne government ez’ebitundu nti kyongezebwe okutuuka ku myaka 7 okuva ku 5 kwekiri.
Ababaka era basazeewo nti boodi z’ebitongole bya government byonna zirondebwemu abantu abalina obukugu obutuukana n’emirimu gy’ebitongole ebyo, era ababikulira babeere n’ekkomo ku myaka gyebalina okubikulemberera.
Era bagala emisolo mu internet gikendeezebwe, kisoboze obuyiiza okweyongera omuziizi mu ggwanga, n’abavubuka basobole okwetandikirawo ebintu ebivaamu ensimbi.
Ttanamiruka w’e Kyankwanzi era yetobeseemu abeeyagaliza obwa sipiika okuli Anita Among ne Nobert Mao okweyogerera ebisongovu.
Nobert Mao yadde wa DP, wiiki nnamba agimazeeko ali Kyankwanzi mu lusirika lwa NRM, alyalese aba DP nga batolotooma.
Mu ttanamiruka oyo yoomu, omukulembeze w’eggwanga atongozza omulimu gw’okuzimba ekizimbe ku bbanguliro lya government lino erya National Leadership Institute Kyankwanzi, ekyabbuddwa mu mutowe era omukwanaganya w’enteekateeka ya Operation Wealth Creation Gen. Caleb Akandwanaho amanyiddwanga General Salim Saleh .
Ekizimbe kino kyatuumiddwa Retired General Caleb Akandwanaho aka Salim Saleh school of Research and Rodney Block, okumweebaza olw’Emirimu gyeyakola mu lutalo lw’ekiyeekera olwaleeta government ya NRM mu buyinza
Ababaka ababadde e Kyankwanzi bakulayizibwa nebanne abalala abebibiina ebirala nga ennaku z’omwezi 13,14 ne 15 ku parliament, bafuuke ababaka abajjuvu aba parliament eye 12.#
