Parliament eyisizza ennoongosereza mu tteeka erirungamya ebibira n’okusimba emiti erya The National Tree Planting amendment bill 2024, n’eggyawo ekitongole ky’eggwanga ekivunaanyizibwa ku bibira mu ggwanga ki National Forestry Authority.
Obuvunanyizibwa bwokulabirira ebibira obubadde bukolebwa ekitongole kino butwaliddwa mu ministry y’amazzi n’obutonde bwensi
Abamu ku babaka ba parliament bwebabadde bakubaganya ebirowoozo ku alipoota y’akakiiko ka parliament akalondoola obutonde bwensi ,akabadde kekeneenya ebbago ly’etteeka lino, balumiriza ekitongole ki NFA olw’okugaba license ezisaanyizaawo ebibira naddala mu Buganda, nebasimba kalitunsi awamu n’okwegabira ettaka ly’ebibira.
Dr Philip Lulume Bayiga talumye mu bigambo bye agambye bri ekitongole Kya National Forestry Authority kibadde kyekobaana n’ababbi b’ettaka nebasanyaawo ebibira nebasimba kalitunsi, oluvanyuma nebabba ettaka era awadde ekyokubirako eky’ebibira ebisaanyiziddwaawo e Buikwe gyava mu mbeera efanaana bwetyo.
Wabula omubaka omukyala owe Kiboga Christine Nakimwero anyonyodde nti wadde byonna biri bityo, nti naye eky’okuggyawo NFA kigenda kusajjula mbeera.
NFA kati yegasse ku bitongole ebirala okuli eky’amata ki Diary Development Authority, NAADS, Cotton Development Authority nebirala parliament byeyasazeewo biveewo obuyinza bwabyo nebudda mu ministry ezibadde zibitwala.#
